Kaisergoos

De Kaisergoos (Anser canagicus, ok: Chen canagica) is en Goos ut de Familie vun de Aantenvagels.

Kaisergoos

Ünnerstamm:	Warveldeerten (Vertebrata)
Klass:	Vagels (Aves)
Ornen:	Gösevagels (Anseriformes)
Familie:	Aantenvagels (Anatidae)
Ünnerfamilie:	Göse (Anserinae)
Tribus:	Echte Göse (Anserini)
Geslecht:	Feldgöse (Anser)
Oort:	Kaisergoos

Wetenschoplich Naam

Anser canagicus

(Sevastianov 1802)

Kennteken

Kaisergööse in'n Park in Ammersfoort

Düsse Goos is bit to 76 cm lang. Se hett en stebigen Lief. De Feddern sünd grau mit fiene Striepen, Kopp un Achtersiet vun'n Hals sünd witt, faken ok hellorange vunwegen veel Iesen in't Water. Gegen de wat blauere Sneegoos over is dat Witt nich dörtrocken bit to'n Ansatz vun'n Hals. Ganner un Goos verscheelt sik nich veel, man bi de Jungen hett de Kopp desülvige Farv, as dat Lief.

Eier von de Kaisergoos

Wie se leven deit

De Kaisergoos is minner sozial, as annere Göseaarden un blifft meist bi de Familie. Se brott nich in Kolonien un verdeffendeert ehr Revier gegen annere Göse. Freten deit se tomeist Planten.

Vermehrung

De Eier weer an de Küst vun de Tundra leggt. En Nest besteiht meist ut dree bit seven Eier. Mit dat Ruden fangt de Kaisergöse an, wenn de Jungen ut'n Ei krapen sünd. Dat duert um un bi een Maand, bit se wedder flegen könnt. In düsse Tied sünd se for Minschen good to fangen. In de Länner, wo se bröden doot, speelt se for dat Een vun Indigene Völker vundswegen en Rull.

Taxonomie

Up de Aardenlist vun de American Ornithologists' Union is de wetenschoppliche Naam Chen canagica, de List vun de International Ornithological Congress nömmt düsse Goos Anser canagicus.

Wo se tohuse is

Düsse Aart brott rund um de Beringsee to, in Alaska un in Kamtschatka. De meisten Vagels overwintert denn up de Aleuten.

Status

De Weltpopulatschoon is in dat Johr 2009 up bi 100.000 Kaisergöse taxeert wurrn. De Tahl geiht achterut. De Grünn dorvun sünd nich düütlich. As dat utsütt, speelt de Jagd en Rull, man ok Eerdööl, wat in de See fleten deit, un wohrschienlich ok de Klimawannel. Vundeswegen steiht düsse Goos up de Rode List vun de IUCN unner „nich wiet af vun Gefohr“

Weblenken

Kaisergoos. Mehr Biller, Videos oder Audiodateien to’t Thema gifft dat bi Wikimedia Commons.