Karl Philipp Alexander von Arberg

Graf Karl Philipp Alexander von Arberg un Valangin (franzöösch Charles Philippe Alexandre d'Arberg de Valangin; * 1778 in Mons; † 18. Mai 1814 in Brüssel) weer en Adeligen un Verwaltungsbeamten in franzöösche Deensten.

Biografie

Arberg is 1776 as Söhn von Graf Nicolaus von Arberg (1736-1813) un Franziska von Arberg (* 1756; ut de Familie Stolberg-Gedern) boren.

Arberg is na 1804 Kamerherr von Napoléon I. un Ridder von de Ehrenlegion worrn. Von 1808 bet 1810 weer he Guvernör op Slott Valençay. An dat Enn von dat Johr 1810 is he Präfekt von dat Departement von de Wersermünnen worrn, dat an’n 1. Januar 1811 opricht worrn is un Deel von dat Kaiserriek Frankriek weer.

Arberg harr sien Amtsseet in Bremen in dat Eelkingsche Huus an’n Doomshoff un later in’n Eschenhoff an de Doomsheid. He hett ok op Good Landruhe in Horn wahnt.

Napoleon sien Nedderlagen in’n Russlandfeldtog von 1812 hebbt dorto föhrt, dat in’t Vörjohr 1813 Unruhen in dat besett Düütschland utbraken sünd. Von Arberg sien Kutsch is an’n 15. März 1813 bi Brinken överfullen un utplünnert worrn. Arberg is denn an’n 17. Oktober 1813 flücht. Na siene Flucht hett de Ünnerpräfekt Johann Pavenstedt de Präfektur övernahmen un bet 1814 behollen, as dat Departement na’n wunnen Krieg von de Allieerten över Napoleon oplööst worrn is.

Von Arberg hett an’n 24. Dezember 1813, na’n Dood von Präfekt Jeanbon Saint-André, dat Amt as Präfekt von dat Departement Donnersberg kregen. He hett dat Amt aver nie aktiv övernahmen.