Karl von Marcard

Karl Wilhelm Ernst von Marcard (* 13. Juni 1856 in Auerk; † 16. Mai 1900 in Gersfeld) weer en düütschen Verwaltungsbeamten un Politiker.

Von Marcard is 1856 as Söhn von Wilhelmine, borene Gosling (10. Oktober 1831-4. März 1919), un Eduard von Marcard (14. Dezember 1826-17. Dezember 1892) in Auerk boren. He weer op de Gymnasien in Hannover, Berlin un Celle un hett an’n 21. September 1877 sien Abitur maakt. He hett von 1877 bet 1880 an de Universitäten Berlin un Göttingen Juristeree studeert un is dor 1879 Liddmaat von dat Corps Bremensia Göttingen worrn. Na dat Studium is he in’n prüüßschen Justizdeenst gahn. An’n 18. Dezember 1880 hett he dat eerste Staatsexamen an dat Oberlandsgericht Celle maakt un is dor an’n 21. Dezember Gerichtsreferendar worrn. He weer denn an dat Amtsgericht Wenngessen, dat Amtsgericht Aimbeck, dat Landgericht Hilmssen un toletzt bi de Staatsanwaltschop Hilmssen. An’n 2. Februar 1884 is he Regerungsreferendar bi de Regerung in Hilmssen worrn un in’n Verwaltungsdeenst wesselt. He weer denn bi de Landdrostie Hilmssen, bi dat Amt Marienborg un denn bi’n Kreis Marienborg. Denn kemen Statschonen bi’n Magistraat, de Regerung un den Bezirksutschuss in Hilssen. An’n 11. September 1886 hett he in Berlin dat twete Staatsexamen maakt. An’n 20. September is he Regerungsassesser worrn un denn in’n Oktober na de polietsche Polizei in Berlin versett worrn. In’n November 1887 is he an de Regerung in Lümborg versett worrn un weer dor von’n 22. November bet to’n 1. April 1888 Viez-Landraad von’n Kreis Paane. Von’n 7. Mai bet to’n 24. September 1888 weer he kommissarsch Landraad von’n Kreis Soltau. In’n August 1889 is he as Landraad un Nafolger von Gustav August Theodor Krekeler in’n Kreis Gersfeld wesselt. Dor is he bet to sien Dood 1900 Landraad bleven. Na em is Karl von Dörnberg Landraad worrn.

In dat Johr 1900 is he Liddmaat von’n Kommunallanddag Kassel worrn un hett dor to de Düütschkunservative Partei höört. He weer dor Maat von’n Ingavenutschuss. Kort later is he denn aver doodbleven.

He hett an’n 29. Dezember 1887 in Kassel Marie Harnier (15. Oktober 1861-28. August 1933; Dochter von Richard Harnier) freet.