Karsten Behr
Karsten Behr (* 12. Dezember 1964 in Hamborg) is en düütschen Politiker von de CDU.
Behr is 1964 in Hamborg boren un weer op de Grundschool an’n Borggraven in Stood. Later güng he na de Vincent-Lübeck-School. Na sien Abitur un Wehrdeenst bi de Bundswehr hett he an de Universität Hamborg Bedrievs- un Volksweertschopslehr studeert. 2009 is Behr Geschäftsföhrer von de Neddersassische Bingostiftung för Ümwelt un Entwicklungstosamenarbeid worrn.[1]
Behr is verheiraadt un hett twee Söhns un een Dochter.
Behr weer al fröh in de Junge Union un in de CDU. 1989 is he Vörsitter von’n Kreisverband Stood von de Junge Union worrn. Von 1993 bet 1995 weer he Bezirksvörsitter von de JU Elv-Werser.[2] Von 1995 bet 2004 weer he Kreisvörsitter von de CDU Stood. Den Kreisvörsitt hett Behr denn na en Affär üm illegale Beschäftigungsverhältnisse in de Stoder CDU-Kreisgeschäftssteed afgeven.[3] Behr is Viez-Bezirksvörsitter von de CDU Elv-Werser.
Behr is 1994 över de Landslist von de CDU Neddersassen in’n Landdag wählt worrn. 1998 hett he as Direktkannedaat in’n Wahlkreis Stood 36,8 % von de Stimmen kregen un kunn sik gegen Erhard Wolfkühler von de SPD mit 50,2 % nich dörsetten. He is denn över de Landslist in’n Landdag rinkamen. Bi de Landdagswahl 2003 is he mit 54,6 Prozent von de Eerststimmen as direkt wählt Afornten för den Wahlkreis Stood in dat Parlament rinkamen un hett sik gegen Wolfkühler (36,3 %) dörsett. Vör de Wahl för den 16. Neddersassischen Landdag an’n 27. Januar 2008 kunn Behr sik nich as CDU-Kannedaat för den Wahlkreis Stood dörsetten un hett gegen Kai Seefried verloren.[4] Bi de Wahl stünn Behr op Platz 79 von de Landslist von de CDU[5] un is denn nich wedder in’n Landdag rinkamen.
As Vertreder von Neddersassen weer Behr von 2003 bet 2008 bi den Kongress von de Gemenen un Regionen von’n Europaraad (KGRE) mit bi. Dat Land hett em toeerst von 2003 bet 2006 as Viez-Maat un von 2006 bet 2008 as Maat in dat beradend Organ von’n Europaraad schickt. In disse Tied weer he ünner annern Viez-Vörsitter von’n Institutionellen Utschuss von de Kamer von de Regionen.[6]
2004 weer Behr för dat Land Neddersassen Maat von de 12. Bundsversammlung.
Behr is Raadsmann in’n Stadtraad von Stood un dor Vörsitter von de CDU/WG/FDP-Grupp.
Behr weer von 1991 bet 2009 in’n Kreisdag von’n Landkreis Stood.[7] Von 2007 bet 2009 weer he de Eerste Viez-Landraad.[8] In’n Kreisdag weer Behr toletzt Maat von’n Kreisutsschuss, von’n Utschuss för Regionalplanung un Ümweltfragen un von’n Utschuss för Weertschop, Verkehr, Bueree un Tourismus.
As Vertreder von’n Landkreis Stood is Behr Maat von’n Opsichtsraad von de Eisenbahnen und Verkehrsbetriebe Elbe-Weser GmbH (EVB), de Sellschoperversammlung von de Verkehrsgesellschaft Nord-Ost-Niedersachsen mbH (VNO) un von de Sellschopperversammlung von de Hamburger Verkehrsverbund GmbH (HVV) .[9]
Footnoten
ännern- ↑ Stiftung beruft CDU-Politiker. In: NWZonline, 11. April 2009. (afropen an’n 22. April 2009)
- ↑ Junge Union wählt Vorstand. Bezirksverband für Auflösung der Bezirksregierungen. In: Rotenburger Rundschau, 12. November 1995. (afropen an’n 24. Juni 2009)
- ↑ CDU Stade: Vorstand gibt auf. In: Hamburger Abendblatt, 7. Oktober 2004. (afropen an’n 24. Juni 2009)
- ↑ CDU-Basis entschied gegen Karsten Behr. In: Hamburger Abendblatt, 24. März 2007. (afropen an’n 24. Juni 2009)
- ↑ CDU-Landesliste (pdf-Datei). (afropen an’n 24. Juni 2009)
- ↑ Kongress der Gemeinden und Regionen Europas (KGRE). Kabinett benennt MdL Behr für KGRE als niedersächsisches Mitglied. In: Presseinformation der Niedersächsischen Staatskanzlei, 15. Februar 2006. (afropen an’n 24. Juni 2009)
- ↑ Behr gibt Mandat im Kreistag auf. In: Hamburger Abendblatt, 4. Mai 2009. (afropen an’n 31. Mai 2009)
- ↑ Der Landrat hat einen neuen Vize. In: Stader Tageblatt, 22. Mai 2007. (afropen an’n 31. Mai 2009)
- ↑ Haushaltsplan 2008 des Landkreises Stade (pdf-Datei). (abgerufen am 24. Juni 2009)