Kathrin Rösel

Kathrin Rösel (* 4. November 1970 in Stendal) is en düütsche Politikerin von de CDU. Von Juni 2016 bet Oktober 2017 weer se Afornte in’n 18. Düütschen Bundsdag.

Leven

Rösel is 1970 in Stendal boren. Nadem Rösel 1990 mit ehr Lehr as Maschinenboerin trech weer, hett se in dat Johr ok noch ehr Abiturprüfung maakt. Von 1991 bet 1997 hett se Optreckerwetenschoppen, Soziologie un Psychologie an de Fre’e Universität Berlin studeert un ehr Studium as Diplom-Pädagogin afslaten.

Von 2003 bet 2006 hett Rösel blangen ehren Beroop tosätzlich noch Sozialmanagement in Bruunswiek studeert un düt Studium mit en Master of Social Management afslaten.

Rösel weer von 1999 bet 2004 Jugendreferentin in de Samtgemeen Brom un bet 2012 Kreisjugendplegerin bi’n Landkreis Gifhoorn. Von 2012 bet 2015 weer se Haupt- un Schoolamtsbaas in de Samtgemeen Mansen. Von März 2015 bet se ehr Mandaat in’n Bundsdag övernahmen hett weer Rösel Eersten Samtgemeenraad in de Samtgemeen Wesendörp.

Rösel hett een Söhn.

Politik

2008 is Rösel Maat von de CDU worrn. Von 2009 bet 2013 weer se Kreisvörsitterin von de Froon-Union Wulfsborg un von 2011 bet 2017 Bezirksvörsitterin von de Froon-Union Noordoostneddersassen. Von 2011 bet 2013 weer se CDU-Frakschoonsvörsitterin in’n Oortsraad Wulfsborg-Stadtmidd. Siet 2017 is Rösel CDU-Viez-Bezirksvörsitterin in’n Bezirk Elv-Werser.

Se is 2014 in’n CDU-Bundsfachutschuss Bildung, Forschung un Innovatschoon beropen worrn.

An’n 4. Juni 2016 is Rösel över de CDU-Landslist Neddersassen in’n Düütschen Bundsdag narückt, nadem Reinhard Grindel sien Mandaat afgeven hett. Dorüm hett Rösel denn as Afornte den Bundsdagswahlkreis Rodenborg I-Heidkreis betreut.

Rösel weer bet Oktober 2017 ordentlich Maat in’n Utschuss för Recht un Verbrukerschutz von’n Bundsdag.

Bi de Bundsdagswahl 2017 weer se Direktkannedaat för de CDU in’n Wahlkreis Rodenborg I-Heidkreis un hett 36,1 % von de Eerststimmen kregen. Dormit kunn se sik nich gegen Lars Klingbeil von de SPD dörsetten. Op de CDU-Landslist Neddersassen stünn se op Platz 18, wat ok nich utreckt hett, üm in’n Bundsdag intotehn.

Ehrenamt

Rösel is 2011 in de Matenversammlung von dat Diakoonsche Wark Wulfsborg e.V. wählt worrn.

Weblenken

• Rösel ehr Websteed (hoochdüütsch)