Katrin Apel
Katrin Apel (* 4. Mai 1973 in Erfurt) is en ehmalge düütsch Biathletin un Skilanglöperin. Se fung as Sössjohrige mit den Skilangloop an, wurr bi de Nordischen Junioren-Skiweltmeesterschapen 1990 mit de Staffel Tweet un wunn 1993 över 5 km klassisch de Bronzemedaille. Van 1994 bit 2007 weer se as Biathletin aktiv. In disse Tiet reck se bi Grootveranstaltungen sössmal de Gold-, sössmal de Sülver- un tweemal de Bronzemedaille. In' Weltcup wunn se 18 Mal mit de Staffel, wurr dreemal Sprint- un eenmal Verfolgungsiegerin.
Werdegang
ännernAnfänge
ännernApel keem dör hör Öllern to'n Skisport un stunn mit 18 Maand all up Skier. Mit söss Johren fung se in dat Trainingszentrum Gräfenroda mit den Skilangloop un weer mit söben Johr all Kreismeesterin. Se traineer in dat Öller vun teihn bit twalf Johren twee- bit dreemal in de Week un hett Wettkampen bestreeden. Neben den Skisport bedreev se as hör Öllern ok Lichtathletik. 1979 keem se an de Polytechnische Böverschool in Gräfenroda un wessel 1985 tosommen mit hör Bröer Jens an de Kinder- und Jugendsportschule (KJS) in Oberhof. Apel weer mit 1,45 m Grött un 33 kg Gewicht för Spood nich utkeeken. Se keem blots deswegen an de Kinner un Jöögsportschool, wiel se goot Crossloopen kunn un teihn Klimmtüüg schaff. In de achte Klass weer se all Dart bi de DDR-Meesterschap un twee Johr later Spartakiade-Siegerin.[1]
Nah de 10. Klass fung se 1989 an de Pädagogisch Fackschool in Schmalkalden en Utbillen to' Uptreckerin an, de se 1993 spoodriek afsluuten dee. Ansluutend is se in de Sportfördergrupp vun de Bundswehr intreeden. In den nee grünnd WSV Oberhof wurr se vun Ullrich Schneider, Kurt Albrecht un Gerold Köhler fördert.[1]
1990 bit 1994
ännernApel hett in hör Tiet as Langlöperin 13 natschonale Titel haalt, weer je dreemal Jöögd- un Juniorenmeesterin un 1991 ok Titeldrägerin in de Aktivenklasse över 5 km klassisch. Bi de Juniorenweltmeesterschap 1990 in Štrbské Pleso belegg se mit de düütsch Staffel den tweeten Platz un een Johr later den veerten Platz över 5 km Freestil un mit de DSV-Staffel. Bi de düütsch Meesterschapen reck se över 10 km un in' Staffelrennen jewiels den darten Platz, un bi de Junioren-WM 1993 wurr se Dart över 5 km klassisch, Veert mit de Staffel un Sösste över 15 km Freestil. So schaff se den Dörbröök in' Langloop. Mit hör dormaligen Vereen WSV Oberhof fier se todem de natschonale Staffel-Meesterschap.[1]
1994 bit 1998
ännernNah de missglückten Qualifikatschoon för de Olympisch Winterspelen 1994 in Lillehammer is Apel körtentslooten in dat Lager vun de Biathleten wesselt. Grünnen weer ok hör Unklorheit över hör Rull un Utnannersetten in' Verband. Wiel se noch in' Langloop-Kader weer, hett se stillkens an dat Scheettraining deelnommen. In hör eerst Saison 1994/95 steeg se in den Europacup in. Apel kunn dorbi an dat Enn' vun de Saison mit en darten Gesamtrang övertüügen. Bi de Biathlon-Europameesterschapen 1995 in Le Grand-Bornand wurr se Dart in' Sprint, un bi de düütsch Meesterschap belegg se mit de Staffel vun Döringen den tweeten Rang. Een Johr later steeg se in den Biathlon-Weltcup up. In de eerst Saison in' Weltcup versegg se aber regelmatig an' Scheetstand, aber in de Staffel övertüüg se mit goot Leistungen. In Oslo muss se in de Staffel glieks twee Straafrunnen dreihn, liekers wurr de Staffel vun dat DSV-Quartetts Eerste.[1]
De Bundstrainer Müßiggang un Co-Trainer Böse hemm hör aber vertroot, so dat se bi de Biathlon-Weltmeesterschapen 1996 in Ruhpolding in de Mannschap un de Staffel to'n Insatz keem un twee Goldmedaillen recken dee. Den eersten natschonalen Titel hett se sück över 15 km haalt, in' Sprint keem Rang twee dorto. In de Weltcup-Saison 1995/96 gelung hör in' Pokljuka in' Eenzel de darte Rang un in de Gesamtwertung de 33. Rang. Bi de WM 1997 in Osrblie hett se mit de Staffel weer de Goldmedaille wunnen. In' Weltcup 1996/97 belegg se an' Enn' vun de Saison Rang 26. Somit harr se sück för de Olympisch Winterspelen 1998 in Nagano qualifizeert. In de Saison 1997/98 hett se sück in de Gesamtwertung up Rang 12 verbeetert. Bi de Olympisch Winterspelen 1998 hett se mit hör Mannschapskolleginnen Uschi Disl, Martina Zellner un Petra Behle de Goldmedaille in de Staffel un in Sprint dorto Bronzemedaille (achter Galina Kuklewa un Uschi Disl) haalt.[1]
1999 bit 2003
ännernDe Saison 1998/99 hett Apel up den achten afslooten. To'n Afsluss vun de Saison kunn se in Val Cartier Platz 3 in de Verfolgung un in Oberhof Platz 2 recken. Se hett mit de Staffel bi de WM 1999 in Kontiolahti weer de Goldmedaille haalt. In' Weltcup 2000 in Ruhpolding wurr se mit blots 1,8 Sekunn Vörsprung Tweet vör Santer un in de Gesamtwertung keem se up den teihnten Platz. Bi de WM 2000 in Oslo kunn se weer övertüügen. Se hett in' Sprint un mit de Staffel de Sülvermedaille wunnen. In de Saison 2000/01 keem se in Osrblie un Ruhpolding jewiels up den darten Rang in' Sprint. Mit de düütsch Staffel reck se bi de WM 2001 de Sülverrmedaille. An' Enn' vun de Saison 2001/02 keem se in de Gesamtwertung up den fievten Rang un fier den eersten Sieg in' Sprint un in de Verfolgung vun Lahti. Bi de Olympisch Winterspelen 2002 in Salt Lake City reck se weer de Goldmedaille mit de Staffel. As Startlöperin muss se in de de Straafrunn, wat hör siet twee Johren nich mehr passeert weer. In de Saison 2002/03 is se vun den WSV Oberhof to'n SV Eintracht Frankenhain wesselt. In de Gesamtwertung lann se up den 20. Rang, bi de WM 2003 in Chanty-Mansijsk weer de 18. Rang in' Sprint hör best Ergevnis, in de Staffel keem se nich to'n Insatz.[1]
2004 bit 2006
ännernDe Saison 2003/04 verleep för Apel beeter as de vörherige Saison, un se keem in de Gesamtwertung up den söbenten Rang. Bi de Heim-WM 2004 in Oberhof wunn se in' Massenstart de Sülvermedaille (achter Liv Grete Poirée aber vör Sandrine Bailly un Simone Denkinger) un in de Staffel de Bronzemedaille. In de Wintersaison 2004/05 hett se sück den veerten Eenzelsieg in' Sprint in Chanty-Mansijsk haalt, un in de Gesamtwertung keem se up Rang 8. En Saison later hett se söben Top-Ten-Platzeerungen in' Weltcup schafft. Bi hör letzt Olympisch Winterspelen 2006 gelung hör blots in de Staffel de Sülverrmedaille. In' Weltcup keem se an dat Enn' vun de Saison nochmal up den achten Platz.[1]
Nah en Saison 2006/07 mit dörsnittlich Leistungen, de dör Probleme mit de Schuller präägt weer, schaff Apel eerstmals siet elf Johren kien Nomineeren för de Biathlon-Weltmeesterschapen 2007 in Antholz un hett an' 26. Februar 2007 hör Rückträe vun de Biathlonsport to dat Saisonenn' verklort. Nah 22 Johren Leistungssport hett se an' 18. März 2007 hör letzt Weltcuprennen in Chanty-Mansijsk bestreeden un keem in de Gesamtwertung up den 19. Rang.[2]
Nah hör Loopbahn
ännernNah dat Enn vun hör Loopbahn streev se neben repräsentativen Upgaven för Sponsoren un Utrüster en tosätzliche Utbillen as Ergotherapeutin an, um „auf jeden Fall wieder mit Kindern zu arbeiten“.[3]
Ehrenbörgerin
ännernGräfenroda, de Heimatgemeend vun Katrin Apel, hett hör in dat Johr 2002 to'n Ehrenbörgerin nömmt.[4]
Weblenken
ännernEnkeld Nahwiesen
ännern- ↑ a b c d e f g Katrin Apel, Internationales Sportarchiv 44/2007 Munzinger-Archiv, van 3. November 2007
- ↑ Katrin Apel macht Schluss
- ↑ Biathlon-Olympiasiegerin Apel hört auf
- ↑ Ehrenbürger