Kelpwoold
En Kelpwoold (Ut de Engelsche Spraak: kelp forest), ok Tangwoold oder Algenwoold nömmt, is en Ökosystem, dat in matige Breden an de Waterkant in de See vörkamen deit. Sien Naam hett he vun den Seetang her, sunnerlich vun en Reeg grote mehrzellige Algen ut de Ordnung vun de Kelpen[1]. Bi de Algen, de in'n Kelpwoold wassen doot, hannelt sik dat meist um brune un Rode Algen. Se sünd dat Tohuse for en unbannige Tahl vun Fisch un Warvellose un speelt ok en grode Rull for allerhand Vagels. Man de Bestand vun de Kelpwolden is hüdigendags in Gefohr. Dat liggt an Deerter, as de Fallhoodjes, de jem freten doot, man ok an Fischeree un dor an, datt dat Water allerwegens up'e Eer warmer warrt, unner annern vunwegen de El Niño-Southern Oscillatschoon.
Kennteken ännern
De groten Algen, de in'n Kelpwoold wassen doot, bestaht sunnerlich ut dree Deele: dat krallenhaftige Organ, wo se up'n Grund mit fastsitten doot (Rhizoid), denn de smiedige Stengel (Cauloid), un boven an de Uppersiete de blatthaftige Wedel (Phylloid). Just so, as bi Woolden an Land, weert dor dree Zonen mit billt, wo Deerter in leevt: Boven - to'n Deel sogar an de Bovensiet vun dat Water - billt de Wedels vun grote Kelpen de Boomkroon.In'e Midden staht de Stengels in't Schummerlicht. In düsse Zoon sünd allerhand Aarden vun Fische togange. Dorunner liggt de düstere Grund.
Kelpen wasst bannig hooch, de Reesenkelp (Macrocystis pyrifera) kann bit hen to 45 m lang weern un dor 30 bit 50 cm an'n Dag bi wassen. Vunwegen, datt de Kelpen so gau wasst, ännert sik de Kelpwoold jummerlos. Butendem riet Störme in'n Harvst un Winter ole Wedels ut'e Kronen rut. Denn kummt wedder mehr Licht bit an'n Grund. Dat kann ok passeern, datt dat Krallenorgan ut'n Grund utreten warrt un de Kelp denn anfangt, free umto to sweven. De Planten sweevt denn bit an de Uppersiete un wasst wieter, bit se an'n Strand löppt oder in warm Water ankummt. Bi so'n enkelte Kelpen könnt sik allerhand Deerter ansammeln.
Literatur ännern
- Sektion Phykologie der Deutschen Botanischen Gesellschaft: Seetang Laminaria ist Alge des Jahres 2007. For de Presse 2007.
- Paul Dayton, Annual Review of Ecology and Systematics Ecology of Kelp Communities (PDF; 3,6 MB): 16 (1985); 215- 245
- George Karleskint et al Introduction to Marine Biology (2009) ISBN 0495561975
- Ronald McPeak, Dale A. Glantz, Carole Shaw: Amber Forest the Beauty and Biology of California's Submarine Forest. Watersport, San Diego CA 1988. ISBN 0-922769-00-1
- Robert Steneck Kelp forest ecosystems: biodiversity, stability, resilience and future Environmental Conservation 29 (4): 436–459 (2002)
Belege ännern
- ↑ Dayton, S. 215
Weblenken ännern
- Marine Education Society Australia (engelsch)
- Monterey Bay National Marine Sanctuary (engelsch)
- Stonybrook University (engelsch)