Kilchoman (Brenneree)

Kilchoman is een vun de jüngsten Whisky-Brennereen vun Schottland un een vun acht aktive Whisky-Destillen op dat Hebriden-Eiland Islay. Se liggt in’n Noordwesten vun’t Eiland un is dormit de eenzige Destille vun Islay, de nich an de See liggt.

Kilchoman
Brenneree Kilchoman (Foto: Peter Church)
Land	Schottland
Region	Islay
Tyyp	Malt
Status	aktiv
Besitter	Anthony Wills
Grünnt	2005
Washstill(s)	1
Spiritstill(s)	1
Produkschoonsvolumen	100.000 l
Websteed	www.kilchomandistillery.com

Historie

Kilchoman is in’t Johr 2005 grünnt worrn – na 124 Johren de eerste ne’e Brenneree op dat Eiland Islay^[1]. In’n Juni 2005 is de Produkschoon anlopen un dat eerste Fatt is an’n 14. Dezember 2005 affüllt worrn. Al 2009 is de eerste Whisky ut de Brenneree in’n Hannel kamen. De eerste Buddel, de verköfft worrn is, hett op en Aukschoon 5.400 £ inbröcht.^[2]

Produkschoon

Dat eerste Fatt

Kilchoman Loch Gorm, 46 %

As een vun blots noch wenige Brennereen in Schottland stellt Kilchoman dat Molt för de Produkschoon sülvst her^[3]. En Deel dorvun warrt mit Törfrook maakt, wat den tyypsch rookigen Smack utmaken deit. In dissen Sinn warrt op dat Rebeet vun de Destille, de Rockside Farm, egens Gasten (Optic Barley) anboet, de aver blots för de Produschoon vun de „100% Islay“-Whisky bruukt warrt. För annere Affüllen warrt ok Gastenmolt vun de Molteree Port Ellen toköfft, de ok sünners starken Törfrook hett.

Mit en Produkschoon vun 90.000 bit 100.000 l in’t Johr (Stand Mai 2011) höört Kilchoman to de lüttsten aktiven Brennereen vun Schottland.