Port Ellen (Brenneree)

Port Ellen is de Naam vun en ehmolige Whisky-Brenneree in den Oort Port Ellen op dat schottische Eiland Islay. En Deel vun de Bowarken sünd in de britischen Denkmollisten in de Kategorie B inordent[1].

Port Ellen

Brenneree Port Ellen

Land Schottland
Region Islay
Tyyp Malt
Status stillleggt (1983)
Besitter Gordon and MacPhail
Grünnt 1825
Grünner Alexander Kerr Mackay
Waterborn Leorin Lochs
Washstill(s) 2 × 28.000 l
Spiritstill(s) 2 × 25.000 l

Historie ännern

 
De Brenneree vördem se afreten weer
 
De Brenneree na’t Afrieten 2009

Grünnt worrn is de Brenneree 1825 dör Alexander Kerr Mackay. 1836 güng se in den Besitt vun John Ramsay, 1920 weer se vun Iaian Ramsay of Kildalton, en Neffe vun John Ramsay, an James Buchanan & Co. un John Dewars & Sons Ltd. verköfft, de 1925 mit de Distillers Company Limited (DCL) tohopengahn sünd. 1929 weer de Brenneree to’n eersten mol dicht maakt. Eerst 1966 is se wedder apen maakt worrn, nadem se moderniseert un de Tall vun de Brennblasen op veer verdubbelt weer. 1973 is en Molteree mit veel Ruum dorto boet worrn, de ok vundaag noch in Bedrief is un de Destillen Ardbeg, Caol Ila, Lagavulin un deelwies ok Bunnahabhain, Kilchoman un Laphroaig versorgen deit. De Törf, de to’n Drögen verfüürt warrt, kummt ut dat Castlehill Moor in de Neeg.

In’n Mai 1983 is de Brenneree denn wedder dicht maakt worrn, 1987 weer se an de United Distillers (UD) verköfft. Deelen vun de Anlaag weern dorna afmonteert, 1992 is denn de Lizenz för de Whiskyprodukschoon opgeven worrn, de bit dorhen bi Low, Robertson & Co legen hett. Dormit stünn fast, dat de Brenneree nich weder apen maakt warrt. Grote Deelen vun de Destille sünd intwüschen afreten worrn. De Lagerhüüs weern aver lange Tiet noch vun de Brenneree Lagavulin nütt[2]. 2008 geev dat al en Twüschenfall in de Brenneree, as in’n November een vun de Gastensilos in sik tosamenfallen is un ruchweg 80 t Gasten en Goorntuun vun’t Navergrundstück ünner sik begraavt hett.

 
Kort na dat Instörten vun den Gastensilo an’n 15. November 2008 (Foto: Duncan MacNeill)

Produkschoon ännern

Port Ellen höör to dat schottische Whiskyrebeet Islay un hett ehr Whisky mit Water ut den Leorin Loch herstellt. De Brenneree harr een Meeschfatt (mash tun) vun mehr as 5,5 t un acht Gäärfatten (wash backs) mit tosamen 240.000 l. Brennt weer in twee wash stills to 28.000 l un twee spirit stills to 25.000 l. Dormit harr de Destille en Kapizität vun ruchweg 800.000 l in’t Johr. De Whiskys ut de Brenneree warrt mit de Tiet roor op’n Markt, sünd aver jümmer noch to köpen. Man, se warrt ok jümmer dürer. As dat bi de Islay-Whisky begäng is, hebbt ok de Whiskys ut Port Ellen en törfigen Röök un Smack.

Kiek ok ännern

Borns ännern

  1. Indrag in de britischen Denkmollisten
  2. Misako Udo, The Scottish Whisky Distilleries, Black & White Publishing 2006, ISBN 1-84502-130-4

Literatur ännern

  • Ralf Bernhardt, Hans Georg Würsching: The Port Ellen Single Malt Whisky Collector’s Guide. Cluaran Verlag, Einhausen 2003, ISBN 3-9809344-1-1.

Weblenken ännern

  Port Ellen. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:55° 38′ N, 6° 12′ W