Kim Jong-il
Kim Jong-il (koreaansch 김정일; * 16. Februar 1941 in Wjatskoje; † 17. Dezember 2011) weer en noordkoreaanschen Politiker. He weer de Generaalsekretär von de Koreaansche Arbeiderpartei, Vörsitter von de Natschonale Verdeffenderenskommission un böverst Baas von de Koreaansche Volksarmee. He gell sied de Tied von sien Vader Kim Il-sung sien Dood 1994 de facto as Föhrer von Noordkorea.
_01.jpg)
Na de offiziellen Angaven, de von de Regeren von Noordkorea kaamt, is Kim an’n 16. Februar von dat Johr 31 na’n Juche-Klenner (1942) op’n Barg Paektu boren worrn. Na Borns buten Noordkorea is he aver al an’n 16. Februar 1941 in Wjatskoje in Russland boren. Sien Vader Kim Il-sung un siene Moder Kim Jong-suk weren to de Tied in’n Wedderstand gegen de Japaansche Herrschop in Korea un weren do in Russland ünnerkamen. De Russen hebbt dormaals in de Geboortsoorkunn den russifizeerten Naam Juri Irsenowitsch Kim indragen. Siene Moder is 1949 doodbleven, as Kim Jong-il acht Johr oold weer. In’e School weer Kim von September 1950 bet August 1960 un is denn an’n 25. August 1960 na de 105. Ryu-Kyong-Su-Garrpanzerdivision „Soul“ kamen, wat von de offiziellen Steden in Noordkorea as de Anfangspunkt von Kim sien Songun-Leidlien angeven warrt.
Von September 1960 bet März 1964 hett he an de Kim-Il-sung-Universität studeert. He is an’n 22. Juli 1961 in de Koreaansche Arbeiderpartei intreden un weer von’n 19. Juni 1964 af an in dat Zentraalkomitee aktiv. In’n September 1973 is he as Sekretär von dat Zentraalkomitee wählt un an’n 13. Februar 1974 Maat von dat Politbüro worrn.
Op’n 6. Parteidag von de Koreaansche Arbeiderpartei (10. bet 14. Oktober 1980) is he denn in dat Präsidium von dat Politbüro un as Maat von dat Zentrale Militärkomitee wählt worrn. Bi de Wahlen för dat noordkoreaansche Parlament in’n Februar 1982 hett he denn en Seet wunnen. In’n Mai 1990 hebbt se em as Viez-Vörsitter von de Natschonale Verdeffenderenskommission wählt un an’n 24. Dezember 1991 as böverst Baas von de Koreaansche Volksarmee. An’n 9. April 1993 denn is he de eerste Vörsitter von de Natschonale Verdeffenderenskommission worrn.
As Generaalsekretär von de Koreaansche Arbeiderpartei is he an’n 8. Oktober 1997 wählt worrn.
An’n 19. Dezember 2011, Klock dree GMT, hett de noordkoreaansche Narichtenagentur KCNA mellt, dat Kim an’n 17. Dezember morgens bi en Reis mit’n Tog en Hartinfarkt kregen hett un dor halvig acht bi doodbleven is.
Priesen un Ehren ännern
De Blomensoort Kimjongilie hett 1988 na Kim Jong-il ehren Naam kregen.
