Kimbern
Kimbern (ok Cimbern schreben) weern wohrschienlich een germaansch Volksstamm, de ut dat nöördliche Jütland (Kimberland, wat nu Himmerland in Däänmark is) stammen de. Tosommen mit de Teutonen un Ambronen sünd se um dat Johr 120 v. Chr. ut ehr Siedlungsrebeet in’ Noorden van Middeleuropa nah de Süüden trucken.
De römsch Geschichtsschriever Plutarch hett in sien Wark Leven vun Marius schreben, dat de Kimbern bi disse Wanderung 300.000 Mannslüüd harrn, de kämpfen kunnen. Man geiht hüdtodag aber dorvan ut, dat dat düchtig överdreven weer, un se man blots 150.000 Mannslüüd harrn.
Se mussen wohl umtrecken nah een Stormfloot, aber man nimmt ok an, dat dor ok noch Klimaänderungen mit dorto kommen sünd. Up de Weg nah den Süüden dropen de versammelt Germanenstammen up de Römers, mit de se Krieg harrt hebbt. Se harrn de Römers (12.000 Mann) all klor besiegt, as dat anfungen de to dönnern. Dor kregen de Germanen Angst un Bang un sünd in all Himmelsrichtungen stiften gahn. 113 v. Chr. weer dat. Dornah sünd se denn nah Gallien trucken, ok dor geev dat weer Krieg, und denn nah de Iberisch Halfeiland. Van dor ut sünd se aber weer nah Italien wannert und hebbt sük dor trennt, wat denn ehr Ünnergang weer. In dat Johr 102 v. Chr. hebbt de Römers eerst de Teutonen und denn de Ambronen besiegt un in dat Johr drupp, de Kimbern in de Ebenen van de Stroom Po.
Dat, wat man hüdtodag as Jütland kennen deiht, wurr fröher ok as Kimbrisch Halfeiland betekend.
Literatur ännern
- Peter Arens: Sturm über Europa - Die Völkerwanderung. München 2002, ISBN 3-550-07523-5