Knechtsand

De Knechtsand is en Hoogsand in de neddersassische Noordsee. De Plaat liggt vör de Münn von de Werser nich wied weg von de Öörd Ox un Berensch, de so bi ölven Kilometer in’n Oosten sünd.

Koort von de Noordsee, de Knechtsand is baven rechts

Geografie

De gröttste Sandbank is de Grote Knechtsand, de 16 Kilometer in’n Noordoosten von Mellum un ölven Kilometer in’n Süüdwesten von Neewark liggt. De Grote Knechtsand is von Oost na West 2,6 Kilometer lang un von Noord na Süüd twüschen 600 Meter (in’n Oosten) un 1600 Meter (in’n Westen) breed. Dat Rebeed, wat över grote Tieden dröög fallt, is so bi 2,6 km² groot.

De grote Knechtsand höört blangen Trischen to een von de wichtigsten Rüüd-Rebeden för de Brandaant un blangen Trischen, Noorderoog un Minsener Oog een von de gröttsten Kolonien för Krietsteerns (Sterna sandvicensis). Ans gifft dat noch Eideraanten un Seehunnen.

So bi twee Kilomter in’n Noordwesten von’n Groten Knechtsand doot de Lütten Knechtsannen liggen.

In’n Oosten von’n Knechtsand liggt de Spieker Barr. In’n Noorden is de Sand dör de Priels Oostertill un Westertill afgrenzt un in’n Süden dör Robins Balje.

Historie

Vörlöpers von’n Knechtsand weren de Hoogsannen Meithörn un Teutel.

Meithörn kummt 1575 toeerst in de Oorkunnen vör. 1653 un 1681 kummt de Plaat wedder in de Oorkunnen vör un dükert toletzt 1703 op. Düsse Sand is ok as hogen Sand betekent worrn un weer alltohoop so üm un bi söven Kilometer lang un 3,5 Kilometer breed.

De Teutel dükert op Koorten ut dat 17. un 18. Johrhunnert op. De Hoogsand weer wohrschienlich ok bi Hoogwater dröög Land, Planten hebbt dor aver woll nich wussen. Dor gifft dat tominnst keen Berichten över. Een von de öllsten Koorten, in de de Teutel opdükert, is 1623 von Willem Blaeu tekent worrn.

De Knechtsand kummt 1683 toeerst vör. Dat weer dormaals aver blots en eenfache Skizze. Genauer beschreven warrt he 1721 un de eersten goden Koorten sünd 1789 tekent worrn.

Nadem de Helgolänners 1945 ehr Eiland verlaten müssen, hebbt de Briten Helgoland as Bummenafsmietplatz bruukt. Üm de Briten dorto to bringen, Helgoland wedder freetogeven, dat de Inwahners wedder trügg köönt, hett Bundskanzler Adenauer de Briten as Utgliek den Knechtsand as Bummenafsmietplatz anbaden. 1952 sünd de Helgolänners wedder trügg op de Insel ween. Von 1952 bet 1957 weer he Knechtsand denn Övungs- un Testgelänn för britsche Bummen. 1957 schull de Verdrag verlängert warrn, aver dat is ut Ümweltschuulgrünn nich maakt worrn. Dat Rebeed is 1957 denn Naturschuulrebeed worrn. Dat gröttste, dat dat bet dorhen geven hett. 1986 is de Knechtsand Deel von’n Natschonalpark Neddersassische Waddensee worrn.

Bi de Stormflood 1962 is an’n 17. Februar dat däänsche Kümo Dunja op’n Knechtsand strannt. Dat Wrack liggt dor ok vondaag noch. Bi de Stormfloden 1973 is de däänsche Frachter Balka op’n Knechtsand strannt. De Balka kunn na söss Weken aver free freesleept warrn.

RWE Dea plaant bi Knechtsand to bohren, üm to kieken, wat dat dor Eerdööl gifft. Dor hebbt se in’n November 2011 en Andrag för stellt. De Waddensee is siet 2009 UNESCO-Weltnaturarv, aver Neddersassen hett bi dat Anmellen von de Weltnaturarv-Rebeden al de Rebeden utnahmen, in de na Eerdööl bohrt warrn schall.

In’n Westen von’n Knechtsand is 2008 de Offshore-Windpark Noordergrünn genehmigt worrn, de aver noch nich över dat Planen rut is.

Dat Öölbekämpfngsschipp Knechtsand driggt den Naam von de Plaat.