Knud IV. (Däänmark)

Knut IV. de Hillige (* 1043; † 10. Juli 1086 in Odense) weer König vun Däänmark.

De Dood vun Knut, den Hilligen, vun Christian Albrecht von Benzon

Allgemeen

He weer de Söhn vun Sven II. Estridsen. 1080 folg he sien Broder Harald III. up den Throon. He versöch, de Macht vun den König up wat stevigere Fööt to stellen. Mit de Kark güng he fründlich üm. He dach, denn schollen em de Bischöpp woll to Siet stahn.

Dat gifft Borns, de geevt an, he harr anordent, dat de Wiehnachtstiet 20 Dage lang fiert weern scholl, bit to'n 13. Januar, dat is de St. Knuts Dag.

Dood

As he in dat Johr 1086 Truppen tohopentrecken dö, vunwegen dat he vörharr, England antogriepen un intonehmen, is dat Volk upsternaatsch wurrn. Da lä woll nich so an sien Vörhebben, sien Land grötter to maken, as veelmehr dor an, dat he verscheden Molen in dat ole Recht un Herkamen ingrepen harr. Knut is tosamen mit sien Broder Benedikt in de St. Albans-Karken in Odense dootslahn wurrn. He harr düsse Kark süms boen laten. Hüdigendags heet se Knutskarken.

Familie

Knut sien Fro Adela vun Flannern weer de Dochter vun den Greven Robert I. vun Flannern. Se kehr na Knut sien Dood torüch in ehr Heimat. Ehr Söhn Karl I. is dor denn ok to'n Greven vun Flannern wurrn.

Marteler

Vunwegen dat Knut as en Fründ vun de Kark bekannt weer un wiel he denn ok noch in en Kark dootslahn wurrn is, is he gau to'n Marteler verklaart wurrn. 1101 is he hillig spraken wurrn. Siene Festadage sünd de 19. Januar un de 10. Juli. He is de Schutzpatron vun Däänmark.