Koreaansch Klenner

De Koreaansche Klenner is en lunisolaren Klenner, de von öllers her in Korea begäng wesen is.

Korea hett 1895 den Gregoriaanschen Klenner annahmen. De traditionellen koreaanschen Fierdaag un Tiedangaven ut de koreaansche Geschicht vör 1895 warrt aver mehrstentieds na’n olen koreaanschen Klenner rekent. De wichtigsten Fierdaag, de na’n koreaanschen Klenner rekent warrt, sünd Seollal (koreaansch Neejohr), Daeboreum (eerst Vullmaand in’t ne’e Johr), Dano (Vörjohrsfest) un Chuseok (Austfest).

För Johrangaven hett de koreaansche Klenner in de Tied von 270 bet 963 de Koreaanschen Äranaams bruukt un denn von 963 bet 1895 de Chineeschen Äranaams. Dat Kaiserriek Korea hett denn von’n 1. Januar 1895 af an den Gregoriaanschen Klenner bruukt, aver de Johren von de Joseon-Dynastie (1393) an rekent.

Von 1945 bet 1961 hebbt se in Süüdkorea de Johren na Gojoseon (2333 v. Chr.) tellt. Noordkorea hett 1997 anfungen, den Juche-Klenner to bruken, wat en Gregoraanschen Klenner is, de de Johren von 1912 af an tellt, dat Johr as Kim Il-sung boren is.

De koreaansche Klenner folgt ok de Regeln von de chineesche Astrologie mit ehre twölv Deertteken un teihn Hevenstämm.