Krüüzspinnen

De Krüüzspinnen (Araneus) sünd en Geslecht ut de Familie vun de Echten Radnettspinnen. Dor höört en paar Hunnert Aarden to. Dor sünd se en vun de gröttsten Geslechter in düsse Familie mit. Krüüzspinnen gifft dat up de ganze Welt. In Middeleuropa sünd mehr as tein Aarden bekannt. Een vun jem is de bekannte Goornkrüüzspinne.

Krüüzspinnen
Goornkrüüzspinne (Araneus diadematus)
Systematik
Domään: Eukaryota ahn Rang: Veelzellers (Metazoa) Afdeel: Geweevdeerter (Eumetazoa) Ünnerafdeel: Tweesiedendeerter (Bilateria) ahn Rang: Ehrdermünner (Protostomia) Böverstamm: Huututtreckers (Ecdysozoa) Stamm: Liddfööt (Arthopoda) Ünnerstamm: Keevklauendregers (Chelicerata) Klass: Spinnen (Arachnida) Ornen: Weevspinnen (Araneae) Ünnerornen: Echte Weevspinnen (Araneomorphae) Familie: Echte Radnettspinnen (Araneidae) Geslecht: Krüüzspinnen (Araneus)
Wetenschoplich Naam
Araneus
Clerck, 1757

Kennteken

Ehren Naam hefft de Krüüzspinnen vun dat Krüüz up dat Achterlief vun her. Bi de Goornkrüüzspinne besteiht dat ut fiev Plackens (veer lange un en Krink in’e Midden) un bi de Veerplackenkrüüzspinne ut veer Plackens. Bi de Plackens hannelt sik dat um Produkte ut den Stoffwessel, de unner den Chitinpanzer aflagert weert. Nich bi all Aarden ut dat Geslecht Araneus billt düsse Plackens worraftig en Krüüz, de meisten Aarden hefft dor en annere Teeknung uptowiesen.

En Goornkrüüzspinne boot ehr Nest

Radnett vun en Goornkrüüzspinne

Junge Goorkrüüzspinne in‘t Nett

Goornkrüüzspinne vun unnen bekeken

En Goornkrüüzspinne hett ehre Büte an ehr Nett an’e Huuswand inwickelt.

Aarden un Synonyme

De Eekenblatt-Radspinne Aculepeira ceropegia, de in de Paläarktis tohuse is, un de Körbsspinne Araniella cucurbitina weert faken in öllere Literatur unner Araneus ceropegia un Araneus cucurbitina upföhrt un to de Krüüzspinnen torekent. Hüdigendags weert se dor avers nich mehr totellt.

• Sumpkrüüzspinne Araneus alsine – Walckenaer, 1802
• Hoornkrüüzspinne Araneus angulatus – Clerck, 1757
• Araneus circe – Audouin, 1826
• Goornkrüüzspinne Araneus diadematus – Clerck, 1757
• Kaventsmannkrüüzspinne Araneus grossus – C.L. Koch, 1844
• Marmelsteen-Krüüzspinne Araneus marmoreus – Clerck, 1757
• Araneus nordmanni – Thorell, 1870
• Veerplackenkrüüzspinne Araneus quadratus – Clerck, 1757
• Araneus saevus – L. Koch, 1872
• Schullerkrüüzspinne Araneus sturmi – Hahn, 1831
• Araneus triguttatus – Fabricius, 1793

Weblenken

Krüüzspinnen. Mehr Biller, Videos oder Audiodateien to’t Thema gifft dat bi Wikimedia Commons.