Lüttje Nakelte Jumfer

De Lüttje Nakelte Jumfer (Galanthus nivalis), ok Gewöhnliche Nakelte Jumfer, is en Plantenaart mank dat Geslecht vun de Nakelten Jumfern in de Familie vun de Narzissenplanten.

Systematik

Klass:	Todecktsadige (Angiospermae)
Ornen:	Asparagales
Familie:	Amaryllidaceae (Narzissenplanten)
Geslecht:	Galanthus

Wetenschoplich Naam

Galanthus nivalis

(Linnaeus)

Kennteken

De Lüttje Nakelte Jumfer is eene duerhaftige Kruutplant. Se warrt meist 7 bit 15 cm hooch (Utnahmen: 2 bit 18 cm). De Plant wasst meist up'n Bulten un sitt in'e Eer. As Spieker to'n Överleven hett de Nakelte Jumfer Zippeln ansett. De Blöer sünd in de Bleieltied al groot, bloß man en beten körter, oder just so lang, as de Blötenstengel. Se sünd so um blaugröön rum farvt un meist twuschen 4,5 un 15 cm lang (Utnahmen: 26 cm). De Blöten staht för sik un hangt an'n Stengel daal. De binnersten Blötenblöer hefft up de Butensiete en grönen Placken. De butersten Blötenblöer sünd um un bi dubbelt so lang, as de binnersten. Bleieltied is vun Februar bit Määrt, to'n Deel geiht dat al in'n Dezember los un duert bit hen na'n April. An de Saatköörn sitt en krümmt Anbacksel (Elaiosom), wat dor för dor is, datt de Iemecken bigaht un de Saat utbreedt.

Wo de Lüttje Nakelte Jumfer vörkamen deit

De Lüttje Nakelte Jumfer kümmt wild vör in Frankriek, Italien, up'n Balkan, in Öösterriek un de Swiez, in Süüdwest-Düütschland, in Süüd-Polen un in de West-Ukraine in Loof-Wolden, meist in en Hööchde vun 300-600 m (man ok vun 100 bit 1.400 m). Sunnerlich wasst de Nakelte Jumfer up Kalkgrund. Wieter in'n Norden vun Middeleuropa un in Noordamerika is de Aart inbörgert wurrn.

Systematik

Dat gifft Twuschenformen vun Galanthus nivalis mit Galanthus reginae-olgae in Italien un up den Balkan, un mit Galanthus plicatus subsp. bycantinus in de Noordwest-Törkei.

Wo de Nakelten Jumfern för bruukt weert

De Lüttje Nakelte Jumfer is wiethen as Goornplant in Goorns un Parks anplant. Sunnerlich in ole Aaftgoorns un up Karkhöve is de Plant utwillert un hett sik inbörgert. Tominnst vun 1568 af an is düsse Aart in Kultur. Dat gifft en ganze Reeg vun Sorten (Utwahl):

'Atkinsi' (unner Umstänn en Hybride mit Galanthus plicatus
'Imperati'
'Scharlockii'
'Flore Pleno': Mit füllte Bleiten. De Soort is vun 1733 af an bekannt.

Annere plattdüütsche Naams

In de plattdüütschen Gemarken sünd de Nakelten Jumfern unner düsse Naams bekannt:

- Märtenblömke
- Naakte Wiefkes
- Nakelt Jüffer
- Nakelt Jümfer
- Nakelt Jumfer
- Slaapbloom
- Sneekieker
- Sneeklocken
- Sneeklockjes
- Sneeklöckjes
- Sneikieker
- Sneiklocken
- Witte Wiefkes

Kiek ok bi

Projekt:Plantennaams up Platt

Literatur

Eckehardt J. Jäger, Friedrich Ebel, Peter Hanelt, Gerd K. Müller (Hrsg.): Rothmaler Exkursionsflora von Deutschland. Band 5: Krautige Zier- und Nutzpflanzen. Spektrum Akademischer Verlag, Berlin Heidelberg 2008, ISBN 978-3-8274-0918-8.

Weblenken

Lüttje Nakelte Jumfer. Mehr Biller, Videos oder Audiodateien to’t Thema gifft dat bi Wikimedia Commons.