Landschopliche Brandkass Hannover

De Landschopliche Brandkass Hannover is en Brandkass, de in Neddersassen in dat Rebeed von dat fröhere Königriek Hannover aktiv is. Tohoop mit de Provinzial Levensversekerung Hannover, de Provinzial Krankenversekerung Hannover un de Provinzial Pensionskass Hannover is de Brandkass tohoopslaten to de VGH Versekerungen.

Liekers is de Brandkass en egenstännig Ünnernehmen, dat dragen warrt von de söss histoorschen Landschoppen von dat fröhere Königriek Hannover: Calenberg-Grubenhagensche Landschop, Landschop von dat Förstendom Hilmssen, Landschop von dat Förstendom Lümborg, Landschop von de Hertogdömer Bremen un Veern, Heien-Deefholtsche Landschop un Landschop von dat Förstendom Ossenbrügge.

De Brandkass sülvs is tohoop mit’n Spoorkassenverband Neddersassen Dreger von de Provinzial Levensversekerung.

Historie

An’n 27. März 1750 hett Georg Wilhelm Ebell, as Abt von dat Klooster Locken Vörsitter von de Landschop von dat Förstendom Calenberg-Grubenhagen, de Brand-Assecurations-Societaet in’t Leven ropen. De Brandkass weer för dat Rebeed von dat Förstendom Calenberg-Grubenhagen tostännig.

De Lüneburgische Brandversicherungs-Gesellschaft is twee Johr later, an’n 20. November 1752, grünnt worrn.

An’n 24. Mai 1755 hett de Landschop von de Hertogdömer Bremen un Veern för dat Rebeed von Bremen-Veern de Brand-Assecurations-Societaet in den Herzogthümern Bremen und Verden grünnt. Üm 1850 rüm hett sik de Naam von de Sozietät in Bremen-Verdensche Brandcasse ännert. De Direkters för de Brandkass hett dat Präsidium von de Landschop stellt.

An’n 8. September 1755 hett de Landschop von dat Förstendom Ossenbrügge för dat Förstendom Ossenbrügge de Osnabrücksche Gebäude-Brandversicherungsanstalt grünnt. De Direkters för de Brandkass hett de [[Landdrostie Ossenbrügge] stellt.

An’n 24. Dezember 1755 is von de Heien-Deefholtsche Landschop in de Graafschoppen Heien un Deefholt de Hoya-Diepholzische Brandversicherungs-Gesellschaft grünnt worrn.

Mit de Hildesheimsche Brand-Assecurations-Casse is de letzte Brandkass von de Landschop von dat Förstendom Hilmssen an’n 12. Dezember 1765 för dat Förstendom Hilmssen grünnt worrn.

De Brandkassen för Calenberg-Grubenhagen un Hilmssen sünd 1750 tohoopleggt worrn. An’n 1. Juli 1851 sünd de Brandkassen von Calenberg-Grubenhagen un Lümborg to de Vereinigte Landschaftliche Brandversicherungs-Gesellschaft tohoopgahn un hebbt an’n 1. Juli 1864 den ne’en Naam Vereinigte Landschaftliche Brandcasse kregen. Düsse Kass hett denn an’n 1. Januar 1873 ok de Brandkass in Heien-Deefholt mit opnahmen, an’n 1. Juli 1878 de Brandkass in Ossenbrügge un an’n 1. Januar 1882 de Brandkass in Bremen-Veern.

Den hüdigen Naam Landschaftliche Brandkasse Hannover hett dat Ünnernehmen an’n 1. April 1913 kregen. De Brandkass hett denn 1922 ok noch de Schaumburg-Lippische Mobiliar-Feuerversicherungs-Gesellschaft un den purmuntschen Deel von de Feuerversicherungs-Anstalt für Waldeck und Pyrmont övernahmen. 1957 hett sik de Brandkass mit de Provinzial Levensversekerung tohoopslaten un hett denn den Markennaam Versekerungsgrupp Hannover (VGH) dragen.

Direkters

• 1864–: Theodor Witte
• 1. Januar 1880–: Theodor Ferdinand Hurtzig
• 1908–: Carl Schrader
• ~1964: Gottfried Matthes

Vörstandsvörsitters:

• opstunns (Stand 2017): Hermann Kasten

Literatur

• 200 Jahre Landschaftliche Brandkasse Hannover 1750-1950. Landschaftliche Brandkasse Hannover, Hannover 1950
• Gottfried Matthes: Die Entwicklung der landschaftlichen Brandkasse zum Stammhaus der Versicherungsgruppe Hannover. Göttingen 1964
• Eike Christian Hirsch: Versicherer im Führerstaat - Hannovers Brandkasse und Provinzial 1933 bis 1945. Wallstein, 2012

Kiek ok bi

• Oostfreesch Landschopliche Brandkass

Weblenken

• Websteed von de VGH Versekerungen (hoochdüütsch)