Lester Halbert Germer

Lester Halbert Germer (* 10. Oktober 1896 in Chicago; † 3. Oktober 1971 in Gardiner, New York) weer en US-amerikaansch Physiker. Tosommen mit sien Kolleeg Clinton Joseph Davisson hett he 1927 eerstmals experimentell de Welleneegenschapen vun Elektronen nahwiest.

Clinton Davisson (links) un Lester Germer (rechts).

Leven

An den Eersten Weltkrieg hett Germer as Kamppilot deelnommen. Nah sien Afsluss an de Columbia University hett Germer ünner de Upsicht vun Clinton Davisson bi den Bell Telephone Laboratories in New York City arbeit. Dor kreegen dat de beid hen, dör dat Anscheeten vun en eenzelt Nickelkristall mit en Elektronenstrahl de vun Louis-Victor de Broglie vörherseggt Welleneegenschapen vun Elektronen nahtowiesen.

Neben sien Berop weer he siet 1945 ok as Bargstieger bannig spoodriek. Bi dat Bestiegen vun en Felsen is he denn kört för sien 75. Gebortsdag an en Hartanfall storven.