Lilongwe
Lilongwe is de Hööftstadt vun Malawi un vun de Zentralregion. Se hett ruch weg 646.750 Inwahner (Stand 2005); de Inwahnertall wasst aber gau.
Se is en ruhigen, ehder verschlaapen Stadt, in de aber in letzte Tiet de Kriminalität (Inbreken) tonimmt. De Stadt is streng na Plaan baut wurrn. Se lett wegen de temlich groot Grundstücken vun de Bauwarken un de breet parkähnlich Boulevards as ländlich präägt. Se is ünnerdeelt in en Oldstadt un en Neestadt, de sück stännig dör Baubedriev wiederwanneln deiht. De Stadtdeelen sünd so wied uteneen, dat een meest blots mit en Auto dor henkamen kann.
Geografie ännern
Lilongwe liggt in’ Süüdwesten vun dat Land, westlich vun de Malawisee, up en Hochebene an de Lilongwe-Stroom, dicht an de Grens to Mosambik un Sambia. De Stadt liggt rund 1200 Meter över NN.
Von Oktober bit April is in Malawi Regentiet.
Historie ännern
De Stadt wurr 1947 as Hannelszentrum grünnd un in dat Johr 1975 as Hööftstadt bestimmt. Se is nich natürlich wussen, sonnern na Plaan upbaut wurrn.
Kultur un Attraktschonen ännern
Lilongwe sülvst hett wenig to beden, wat man sück ankieken kann, is aber Utgangspunkt för völ Reisen dör dat Land. De Regenwoold un de Malawi-See sünd nich wiet weg. Dicht bi is dat Salanjama, en Rebeet, dat wegen sien völ verscheeden Vagels bemarkensweert is.
Wertschap ännern
Lilongwe is dat Verwaltenszentrum vun Malawi. Mit de wertschaplich Dynamik vun Blantyres (547.500 Inwahner) kann de Stadt nich mithollen. Aber dor finden Tabakauktschonen statt, Malawi sien wichtigst Exportgood.
De Wertschap vun Lilongwe wurrd völ vun Inders dragen, de blots hier, in Blantyre un in Zomba siedeln dröfft. Dorto gifft dat noch völ Expatriate.
Lilongwe hett ok en landwertschaplich Hoochschool un en Flooghaven, den Kamuzu International Airport.