Ludovico Scarfiotti
Ludovico Scarfiotti (deelwies ok Lodovico Scarfiotti[1]; * 18. Oktober 1933 in Turin; † 8. Juni 1968 in Berchtesgaden, Düütschland) weer en italieensch Formel-1- un Sportwagenrennfohrer. 1956 hett Scarfiotti all söben Klassensiege in Bargrennen haalt un weer mehrfack italieensch Meester.
Karriere
ännernScarfiotti weer en Enkelsöhn van Lodovico Scarfiotti, de 1899 in Turin ünner annern tosommen mit Giovanni Agnelli de Fabbrica Italiana Automobili Torino mitbegrünnd hett un later eerst Präsident vun dat Ünnernehmen weer.[2] Sien Vader Luigi weer Ingenieur, Rennfohrer un van 1934 bit 1939 Afordneter van de Camera dei deputati del Regno d’Italia.[3][4]
Sien eerst Formel-1-Rennen is Scarfiotti bi den Grooten Pries van de Nedderlannen up den Circuit Park Zandvoort in de Saison 1963 fohren. Tüschen 1963 un 1967 is he sössmal för Ferrari fohren. Sien best Ergevnis weer de Sieg bi den Grooten Pries van Italien up den Autodromo Nazionale Monza in dat Johr 1966.
Nah en Rennen för dat Team AAR Eagle mit den Eagle T1G-Weslake in 1967 un dree wiederen Rennen 1968 för Cooper hett he sien Formel-1-Karriere mit insgesamt 17 WM-Punkten in teihn Rennen afslooten.
Wiels he in de Formel 1 nich to de Spitzenklass tellen dee, weer Scarfiotti aber en van de best Sportwagenfohrer in sien Tiet un hörr to de Ferrari-Mannschap mit John Surtees, Mike Parkes, Lorenzo Bandini un Nino Vaccarella. He wunn ünner annern 1963 de 12 Stünnen van Sebring tosammen mit Surtees un de 24 Stünnen van von Le Mans mit Bandini, 1964 dat 1000-km-Rennen up den Nürburgring mit Nino Vaccarella un een Johr later nochmal mit Surtees; 1966 dat 1000-km-Rennen van Spa-Francorchamps. 1962 un 1965 weer he up Ferrari Europa-Bargmeester in de Sportwagen-Kategorie. Enn’n van de Saison 1967 wessel he van Ferrari to Porsche.
Scarfiotti is 1968 nah en Unfall bi dat Training to dat Bargrennen up de Roßfeldhöhenringstraße dicht bi Berchtesgaden storven. De Unfalloorsaak hett man nich funnen. Nah umfangriek Ünnersöken wurr en tonächst annommen Fohrfehler utslooten un ok en technischen Defekt an den van hüm fohren Porsche 909 Bergspyder gellt as nich wohrschienlich.
Literatur
ännern- Christian Moity, Jean-Marc Teissèdre, Alain Bienvenu: 24 heures du Mans, 1923–1992. Éditions d’Art, Besançon 1992, ISBN 2-909-413-06-3.
- Paola Rivolta: Scarfiotti. dalla Fiat a Rossfeld. Liberilibri, Macerata 2018, ISBN 978-88-98094-44-8 (italienisch).
Weblinks
ännern
Ludovico Scarfiotti. Mehr Biller, Videos oder Audiodateien to’t Thema gifft dat bi Wikimedia Commons.
- Ludovico Scarfiotti bi Racing Sports Cars (engelsch)
- Lodovico Scarfiotti. www.motorsportmemorial.org, afropen an’n 4. Januar 2019 (engelsch).
Enkelt Nahwiesen
ännern- ↑ Rivolta (2018)
- ↑ Il rapporto della famiglia Favale-Scarfiotti con Potenza Picena. www.ilcittadinodirecanati.it, 8. August 2018, afropen an’n 18. Mai 2020 (italieensch).
- ↑ Luigi Scarfiotti. In: Parlamento Italiano. storia.camera.it, afropen an’n 18. Mai 2020 (italieensch).
- ↑ EX-LUIGI SCARFIOTTI, SCUDERIA FERRARI, 1930 ALFA ROMEO 6C 1750 GRAN SPORT SPIDER, CHASSIS NO. 8513033, ENGINE NO. 8513033. In: Bonhams. www.bonhams.com, afropen an’n 18. Mai 2020 (engelsch).