Dat Amt vun den Magister equitum (Meester vun de Peer) weer en Amt, datt in de Röömsche Republiek för en sunnerliche Tied utöövt wurrn is. In de late Kaisertied is Magister equitum de Titel för den Böverbefehlhebber vun de Kavallerie in dat Weströömsche Riek wurrn.

Wenn dat Krisentieden in Rom geev, denn hett de Diktater vun Rom den Magister equitum to sien Stellverträer maakt. Ganz an'n Anfang hett he woll bloß dat Kummando över de Riederlüde harrt.

Jedeen röömschen Börger konn an un for sik an düt Amt rankamen, ok wenn he nich eerst dör den Cursus honorum dörlopen weer. Dat hett keen Amt oder Institutschoon geven, de den Magister equitum afsetten dröff. Wenn de Krisentieden vörbi weeern, denn höör dat Amt, tohopen mit dat vun den Diktater, vun alleen up.

In de Late Antike weer de Deenst vun den böversten Heermeester in den Westdeel vun dat Riek eerst noch up twee Ämter verdeelt. De Magister equitum weer Baas vun de Kavallerie, de Magister peditum stünn de Infanterie vör. Mit dat vörmolige Amt in de Republiek hett de Saak avers nix mehr to doon harrt.