Makedonien (greeksche Region)

Makedonien, ok Mazedonien, (up Greeksch: Μακεδονία, Makedonía), hen un wenn ok Ägäis-Makedonien oder Süüd-Mazedonien (Up Bulgaarsch: Егейска Македония или Южна Македония, Egeyska Makedoniya ili Juzhna Makedoniya) is en Region in den Norden vun Grekenland. Dor hannelt sik dat um de Deele vun de ganze Region Makedonien bi, de hüdigendags in Grekenland liggen doot. De annern Deele höört vundagen to dat sülvstännige Noordmakedonien. En lüttjeren Deel vun Makedonien is vundagen ok Deel vun Bulgarien, noch lüttjere Stücke vun de Region höört to Albanien un Serbien.

Dor liggt de Region Makedonien in Grekenland

De greeksche Region Makedonien besteiht ut Westmakedonien un Zentralmakedonien mit ehre ganzen Bezirke, un dor to noch ut de dree westlichen Bezirke vun de Oostmakedonien un Thrakien. Tolest höört dor ok noch de autonome Mönksrepubliek Athos to.

De gröttste Stadt vun de greeksche Region Makedonien is Thessaloniki. Se is ok Makedonien sien weertschopplich un kulturell Zentrum.

De verscheden Deele vun de Region Makedonien. De Deele, de to Grekenland tohöört, liggt unnen an'n de See

Geografie

Makedonien is 34.177 km² groot. Dor is dat de gröttste geograafsche Region (gr. geografiko diamerisma γεωγραφικό διαμέρισμα) vun Grekenland mit. In Norden grenz dat an Albanien, Noordmakedonien un Bulgarien. In’n Westen grenzt dat an de greeksche Verwaltungsregion Epirus un in’n Süden an Thessalien. In’n Osten grenz Makedonien an den Nestos-Stroom an dat greeksche Thrakien. In’n Süden vun Makdedonien liggt de Agäische See un dat Eiland Thasos. Up Makedonien siene gemarken liggt Grekenland sien gröttst Stück Deepland.

Klima

Dat Klima in Makedonien is kontinental. An de Küsten warrt dat präägt vun de Middellannsche See. Anners, as in de annern Kuntreien in Grekenland is de Winter in Makedonien tämlich kull un dat gifft allerhand Neddersläge. Vorjohr un Summer sünd warm, dat regent man wenig un de Sunne schient duchtig (mehr, as 2.000 Stunnen in’t Johr).

Inwahners

In Makedonien leevt 2.625.681 Inwahners. Dor leevt 76,82 Inwahners mit up een km². De Inwahnerschop in Makedonien hett sik sunnerlich in dat 20. Johrhunnert heel un deel ännert, as grote Volksgruppen twuschen Lüttasien un Makedonien hen un herschaven wurrn sünd. Gegen de annern Regionen in Grekenland over, hett Makedonien en starke Egenoort. To’n Deel liggt dat an de Historie, man een Grund is ok de Wettstriet twuschen Thessaloniki un Athen. Dat warrt dor vun snackt, dat Politikers ut Makedonien sunnerlich „makedoonsche“ Egenorden vor to wiesen harrn.

De grote Mehrheit vun de Inwahners sünd hüdigendags Greeksche Makedoniers. Dor höört ok en ganzen Deel vun Greken to, de ehre Vorwesers in de 1920er Johre as Pontus-Greken ut Lüttasien verdreven wurrn weern un de den Platz vun de Nichgreken innahmen hefft, de nu ut dat greeksche Makedonien utsiedelt wurrn weern.. Man dat gifft jummers noch en lüttje slawo-makedoonsche Minnerheit, sunnerlich in de Präfekturen Kilkis un Florina. Hen un wenn finnt sik ok noch lüttje Gruppen vun Aromunen, Meglenorumänen un Armeniers.