Martin Döscher

düütsch Politiker

Dit Woort hett noch annere Bedüden: kiek dorför ünner Martin Döscher (1905–1993).

Martin Döscher (* 3. Februar 1935 in Köhlen; † 22. September 2019 in Bremerhoben) weer en düütschen Politiker von de CDU.

Döscher is 1935 as Söhn von Martin Döscher senior in Köhlen boren un hett en Twillingssüster. He hett in Köhlen von 1941 bet 1950 ok de Volksschool besöcht. Von 1951 bet 1954 weer he op de Ackerboschool in Beers un denn op’n Lehrhoff in Brouk. Na düsse Tied hett he noch bet 1969 den Familienhoff in Köhlen bewirtschaft.[1]

He is 1968 in de CDU ringahn un weer twee Johr Kreisvörsitter von de Junge Union. 1970 is he Geschäftsföhrer von de CDU in’n Landkreis Cuxhoben worrn. In’n Oktober 1968 keem he in’n Gemeenraad von de Gemeen Köhlen un is in’n November 1972 Börgermeester worrn, wat he bet 2011 bleven is. Ok in’n Raad von de Samtgemeen Beers is he von November 1972 bet 2006 inwesen. To’n 1. November 1976 is he in’n Kreisraad von’n Kreis Wersermünn wählt worrn un weer na de Kreisreform 1977 in’n Kreisraad von Landkreis Cuxhoben. Afornten in’n Kreisraad is he bet 2006 bleven. Von’n 11. November 1991 af an weer he as Nafolger von Martin Steffens denn Landraad. To’n 31. Januar 2004 hett em Kai-Uwe Bielefeld aflööst.

För veer Wahlperioden weer Döscher von’n 21. Juni 1978 bet 20. Juni 1994 ok Maat von’n Landdag von Neddersassen. He is bi de Wahlen 1978, 1982, 1986 un 1990 in’n Landdagswahlkreis Hadeln jümmer direkt wählt worrn.

Döscher weer verheiraadt mit siene Fro Lisa, borene Meyerherm, un harr veer Kinner. He is an’n 22. September 2019 in dat Krankenhuus Reinkenheid in Bremerhoben doodbleven. De Truurfier weer an’n 28. September 2019 in de Fabian-Kark in Ringst. He liggt op’n Karkhoff Köhlen begraven.

Bi polietsche Optreed in siene Heimaat is he jümmer wedder dor dör opfullen, dat he jümmer en Quetschkommood dorbi harr un dor geern op speelt hett, un dat he siene Reden geern op Platt hollen hett.[1]

Ehren ännern

1999 hett he dat Ehrenteken in Sülver von’n Landkreis Cuxhoben kregen, 2002 in Gold un 2006 den Ehrenring. 1993 hett he dat Bundsverdeenstkrüüz an’t Band un 2004 dat Neddersassische Verdeenstkrüüz 1. Klass kregen. An’n 1. Februar 2004 is he Ehrenlandraad worrn.

2011 hett em sien Heimaatoort Köhlen to’n Ehrenbörgermeester maakt un 2014 to’n Ehrenbörger.[1]

Footnoten ännern

  1. a b c Andreas Schoener: Trauer im Cuxland: Ehrenlandrat Martin Döscher mit 84 Jahren gestorben. Ein Mann des Volkes, Niederelbe-Zeitung an’n 24. September 2019, Sied 10

Weblenken ännern