Max Jänecke

Max Jänecke (* 28. August 1869 in Hannover; † 2. November 1912 ok dor) weer en düütschen Bookhändler, Druckereebesitter un Politiker.

Jänecke is 1869 as Söhn von’n Kommerzienraad Georg Jänecke (10. September 1827–20. Dezember 1904) in Hannover boren. He weer dor bet 1886 op dat Kaiser Willem-Gymnasium un weer 1886/1887 in Genf. He hett denn in de Firma Gebröder Jänecke arbeidt un is in Marburg as Bookhändler anfungen. Eerst later hett he dat Abitur nahaalt un hett an de Universitäten Marburg, Berlin un Leipzig Geschicht un Volkswetenschop studeert. 1892 hett he in Marburg sien Dr. phil. maakt. He hett Reisen na Noordamerika, Spanien un Marokko maakt. Na disse Tied hett he denn wedder bi Gebröder Jänecke arbeidt. He weer ok Mitbesitter von de Firma un Prokurist bi de Firma Gebröder Jänecke & Fr. Schneemann.

Tosätzlich weer he Leutnant von de Reserve von dat Ollnbörgsche Draguner-Regiment Nr. 19 un hett de Landwehr-Deenstutteeknung II. Klass kregen. He weer von 1902 bet 1911 Vörsitter von’n Vereen von düütsche Zeitungsverleger.

Bi de Wahl 1903 to’n Rieksdag hett Jänicke den Wahlkreis Hannover 16 wunnen un weer denn bet Februar 1904 Afornten för de Natschonalliberale Partei. Na en Nawahl hett Adolf von Wangenheim-Wake sien Platz in’n Rieksdag övernahmen. Bi de Wahl 1903 to dat prüüßsche Aforntenhuus hett he in’n Wahlkreis Lümborg 6 (Lümborg, Winsen) 57,3 % von de Stimmen kregen un weer denn bet to de nächste Wahl 1908 Afornten för de Natschonalliberale Partei.

Jänecke hett an’n 16. März 1895 Bertha Schellhass (14. Januar 1875–15. März 1896) freet. De beiden hebbt 1896 en Söhn kregen. Siene Fro is aver söss Weken na de Geboort in’t Kindbedd doodbleven un dat Kind en poor Maand later ok. Jänecke hett denn noch en tweet Maal freet. He is 1912 in Hannover dör Suizid storven.