Menarche
As Menarche (ooltgr. μήν mên ‚Maand‘ un ἀρχή archê ‚Anfang‘) Warrt dat eerste Optreden vun de Menstruatschoon in de Pubertät betekent. Se finnt to’n Enn vun de pubertären Entwickeln hen statt. Se wiest aver nich eendüdig an, dat de Deern nu al Kinner kriegen kann, vunwegen dat de eersten Menstruatschonen faken ahn Eisprung afloopt, man dör sieten Hormonspegel utlöst warrt. En regelmatigen Zyklus mit Eisprung billt sik tomeist na annerthalf bit twee Johren ut.
Wesseln Tietpunkt vun de Menarche ännern
För’t Beschrieven vun’t Entwickeln vun de Pubertät is de Menarche bi Deerns sünners goot egent, jüst so as de Spermarche bi Jungs. De Tietpunkt hangt vun verschedene Fakters af as de Ethnie, de Geografie, Nehren aver ok individuelle Saken. För Deerns liggt de Tietduer twüschen dat Optreden vun eerste Markmolen as dat Wassen vun de Bost oder vun’t Schaamhoor un de Menarche bi ruchweg 2,2 bit 2,7 Johren, kann aver vun Fall to Fall ok weniger as een Johr bit mehr as söss Johren duern. In Düütschland finnt de Menarche tomeist twüschen dat 10. un dat 16. Levensjohr statt.
In’t fröhe 19. Johrhunnert leeg disse Tietpunkt noch twee Johren later. En düütlich Verschuven vun de Menarche is üm 1850 to’n eersten mol opduukt.[1] Siet de Tiet is se in’n Dörsnitt jeed Johrteihnt dree bit veer Maanden fröher kamen.[2][3] De Ünnerscheden vun de Tiet vun’t Riepen twüschen verschedene Populatschoonsgruppen gaht vör allen op de ünnerscheedlichen Ümweltbedingen un Nehrmiddel torüch,[4] warrt aver ok vun de hygieensch-sanitären oder medizinischen Kultur-Bedingen stüert. In enkelte Fäll is beleggt worrn, dat de Menarche al vör den 6. Geboortsdag leeg.[5]
Bi glieke Levensümstännen in verschedene Populatschonen künnt ok geneetsche Ünnerscheden för ünnerscheedliche Tietpunkten vun de Menarche en Rull spelen. Dat warrt doröver diskuteert, dat mööglicherwies en sünnern Andeel (> 17 %) an Lieffett nödig is, üm in de Pubertät to kamen,[6] so dat dat Riepen bi junge Leistungssportlersches un Magersüchtige later insetten deit. Ut statistische Ünnersöken is to sehn, dat de Menarche woll mit en Mindstliefgewicht vun 48 kg tosamenhangt.
Weblenken ännern
Borns ännern
- ↑ Plowden Report: Children and their Primary Schools, Part Two: The Growth of the Child (Diagramm 2), 1967
- ↑ Gerd Mietzel: Wege in die Entwicklungspsychologie. Bd.1 Kindheit und Jugend, 4., överarb. Opl. XII, Beltz Psychologie Verlags Union, 2002, ISBN 3-621-27477-4, eerste Regelblöden, S. 354
- ↑ Hans-Heinrich Thiemann, Inna Nitz, Andreas Schmeling et al. (Rgv): Röntgenatlas der normalen Hand im Kindesalter. Bd. VII, 3. Opl., Thieme, Stuttgart 2006, ISBN 3-13-766603-1, 9 - Allgemeine Befunde, Menarche
- ↑ S. Steingraber: The Falling Age of Puberty In U.S. Girls. Calif Breast Cancer Fund, San Francisco 2007
- ↑ W. Stoeckel: Lehrbuch der Gynäkologie. 1947, S. 259f. As Born in den beschrevenen Fall warrt hier Chaschinsky und Jerschow, Zbl. Gynäk. 1933, Nr. 38 nömmt
- ↑ H.S. Mumby et al.: Mendelian Randomisation Study of Childhood BMI and Early Menarche. In: Journal of obesity Vol. 2011 (2011), Artikel ID 180729, DOI 10.1155/2011/180729