1,1,1-Trichlorethan

Strukturformel
Allgemeen
Naam	1,1,1-Trichlorethan
Annere Naams	Ethyltrichlorid Methylchloroform
Summenformel	C2H3Cl3
CAS-Tall	71-55-6
Kortbeschrieven	Fletigkeit ahn Klöör mit söten, etheerschen Röök
Egenschoppen
Molar Masse	133,42 g·mol–1
Phaas	fletig
Dicht	1,34 kg·m–3
Smöltpunkt	-30 °C
Kaakpunkt	74 °C
Dampdruck	133 hPa (20 °C)
Löslichkeit	1,3 g/l in Water
Sekerheitshenwiesen
Gefahrstoffkennteken
Gefahrenteken Xn Gesundheits- schäädlich N Ümwelt- gefährlich
R- un S-Sätz	R: 20-59
	S: (2)-24/25-59-61
Wietere Sekerheitshenwiesen
MAK	1100 mg/m³
Sowiet mööglich un tyypsch, warrt dat SI-Eenheitensystem bruukt. Wenn nich anners anmarkt, gellt de angeven Daten bi Standardbedingen.

1,1,1-Trichlorethan (fröhere Trivialnaam: Methylchloroform) is en cheemschen Stoff ut de Grupp vun de Chlorkohlenwaterstoffen. De Stoff is en Isomer to 1,1,2-Trichlorethan.

Produkschoon

1,1,1-Trichlorethan warrt dör Chloreren vun 1,1-Dichlorethan herstellt. En annern Weg is dör Additschoon vun Chlorwaterstoff an 1,1-Dichlorethen.

Egenschoppen

1,1,1-Trichlorethan is en Fletigkeit ahn Klöör mit en tyypschen etheerschen Röök, de vergliekbor is mit den Röök vun Chloroform. Mit Water is de Stoff kuum to mischen. Dormit is dat hydrophob un lipophil, de Dämp sünd sworer as Luft. As ok annere Chlorkohlenwaterstoffen is 1,1,1-Trichlorethan unbestännig gegenöver Licht, Luft un sünners Fuchtigkeit. Bestänniger warrt dat dör Togaav vun bit to 6 % Dioxan oder 2-Butanol wiel de Produkschoon. Mit Alkali, Erdalkali un annere Metallpulvers reageert dat explosionsordig.

Bruuk

Trichlorethan is de Utgangsstoff för de Synthees vun polychlorerte orgaansche Verbinnen dör Additschoonsreakschonen mit nich-sättigte Verbinnen. Sien Bedüden as Löösmiddel is bannig torüchgahn, siet kloor worrn is, dat de Stoff to dat Ozonlock bidrägen deit.

Vörher weer 1,1,1-Trichlorethan as Löösmiddel in Farven, Kleevstoffen un to’n Reinmaken vun metallsche Warkstücken, Glas un optische Reedschoppen insett. Dat kann ok in Korrekturfletigkeiten binnen wesen. To’n Bispeel bargt Tipp-Ex 1,1,1-Trichlorethan as Löösmiddel. Wegen de mööglichen Gefohr för de Gesundheit gifft dat dorvun aver ok en Afoort op Grundlaag vun Water.

Sekerheit

De Dämp künnt de Sliemhüüt angriepen, ofschoonst de Stoff en minnere Toxizität opwiest as Tetrachlormethan. Lebber- un Nerenschadens sünd mööglich, wenn de Stoff in’n Lief opnahmen warrt. Trichlorethan, dat as Gas opnahmen warrt, warrt mit de Atenluft meist vullstännig wedder utscheedt. En lütten Deel warrt in’n Lief to Trichloretigsüür un Trichlorethanol verstoffwesselt. En Fruchtschaden is utslaten, wenn de MAK-Weert inhollen. As vele Löösmiddels wirkt 1,1,1-Trichlorethan op de Huut: Dat lööst so veel Fett ut de Huut, dat ok dat en Schaden maken kann. Wieter sleih dat ok de Atenweeg, de Verdauensweeg un de Ogen. Swinnel, Koppweh, Benüsseltheit bit hen to en Bewusstlosigkeit un annere Bregenstören künnt vörkamen.

Dör photocheemsche Vörgäng künnt in de Stratosphäär Chloratomen freesett warrn, de de Ozonschicht tweimaken künnt.