Meuteree

Meuteree is en Upstand gegen de Lüde, de dat Seggen hefft. In de ganze Welt warrt se as Verbreken ankeken. Sunnerlik kummt dat Woort ut de Welt vun dat Militär, man noch bekannter is dat vun de Seefohrt her. Dor speelt dat in Böker un Filme en grote Rull.

Militär

Na dat düütsche Wehrstraafgesett is de Meuteree na § 27 WstrG bi dat Militär, wenn sik Suldaten tosamen doot un alltohopen en Befehl nich utöven doot, oder wenn se gegen de Boversten gegenan goht oder se angriepen doot. Dor gifft dat amenne twuschen sess Maande un fiev Johre Straaf for. Unner sunnerlich swaare Umstänn (wenn een de Anföhrer vun en Meuteree is, oder wenn dor Gefohr for de Sekerheit oder Slagkraft vun de Trupp, oder Gefohr for Liev un Leven vun kaamt, kann dat ok een Freeheitstraaf vun een bit 10 Johre geven. Ok, wenn een sik blot verafreedt hett to en Meuteree, oder wenn een bi en Versöök mitmaakt hett, fallt dat up jeden Fall unner en Straaf, ok, wenn een later nich mehr mitmaakt hett.

Seefohrt

In Düütschland warrt dat in de Seefohrt as Meuteree ankeken, wenn de Mannschop vun en Schipp oder Deele vun de Trupp up en Schipp tohopen gegen een oder mehr vun de Uppersten gegenan geiht. Faken warrt avers allens „Meuteree“ nömmt, wat in § 115 un § 116 vun dat Seemanngesett steiht, also „Nich doon, wat anordent wurrn is“ un „Wedderstand“.

In de Seefohrt hett dat for Meuteree over Johrhunnerte meist jummers de Straaf to’n Dode geven.

In de engelsche Seefohrt hett dat heten: „Een Befehl, den du utföhren deist (ok, wenn he keen Sinn maakt) is Deenst. En Befehl, den du nich utföhren deist, is Meuteree.“

Bekannte Meutereen up Scheepe

De Meuteree up de Bounty is up de ganze Welt bekannt

Bekannte Meutereen hett dat up düsse Scheepe geven:

• 1628: Batavia
• 1789: Bounty
• 1905: Knjas Potjomkin Tawritscheski, so nömmte "Panzerkrüzer" Potemkin
• 1931: Invergordon-Meuteree in Grootbritannien
• 1975: Storoschewoi (Сторожевой), Fregatt vun de Kriwak-Klass bi de Sowjetschen Marine - Grundlaag for den Film Jagd auf Roter Oktober.