Deefholter Moorsnuck

De Deefholter Moorsnuck oder Moorsnuck is en ganz lüttjet Schaap un höört to de Familie vun de Heidsnucken. Anners as de Heidsnucken, de dat bi us gifft, is de Moorsnuck witt un hett keen Höörn.

Herkamen

De Moorsnucken kaamt ut de Moorlänner in Neddersassen. Dat warrt annahmen, dat se tostanne kamen is, as de Griese Heidsnuck mit Höörn krüüzt wurrn is mit en slichtwullen Landschaap ohn Höörn. Siet Johrhunnerten warrt se holen in de moorigen Sietlänner in Noorddüütschland. Vun 1922 af an warrt se as en egen Raass föhrt.

Wo dat Deefholter Moorsnucken gifft

In de Hoochmooren un up magere Wischen in Noord- un Middeldüütschland gifft dat hüttodaags düsse Schaap. Tücht weert se besunners in de Moor- un Sietlannen bi Deefholt. Toeerst weern se tohuse in de hüdigen Landkreisen Deefholt, Nienborg un Rodenborg. De Naam Deefholter Moorsnuck is as en regionalen Naam schuult un is vun de EU in de List vun de „Schuulten Naams vun dat Herkamen“ upnahmen wurrn.

Wat de Moorsnuck freten deit

De Snucken freet verscheden Sorten vun wille Gräser, as Piepengras, Seck, Suerstengel, Poggenstöhl, Mosen, Flechten un allerhand Kruut, as verscheden Sorten vun Heid, Bickbeern, Moosbeern un annere Beern, dorto Blöer vun Barkenbööm un Nadeln vun Föhren. Dat sünd allens Planten, de anner Schaap gor nich ankieken möögt.

Egenarten

De Moorsnuck kann wunnerbor in Moor un Sietland torechtkamen. To'n Deel schafft de dat ok un kümmt ut Waterlöcker in't Moor ganz vun alleen wedder rut. Se bruukt nich veel un geiht ok dör kneedeep Water dör. Se passt allerbest to'n Plegen un hegen vun de Natur un vun de Landschop. Jem ehr Fleesch warrt as besunners lecker ankeken. Dat Fleesch hett weniger fett un is düsterer, as bi annere Schaap. Vunwegen de natüürliche Uptucht smeckt dat Fleesch, as Wild.

Dat Lief

Heken un Seken dreegt keen Höörn. De Kopp is lang un de Ohren staht schraag af. Knaken sünd licht un fien, de Klauen ganz hart un hell.

Schufthööcht	Buck: 55-60 cm, Auschaap: 45-50 cm
Gewicht	Buck 60-70 kg, Auschaap: 40-50 kg
Höörn	ohne Höörn
Klöör	Witt
Haar	Mischwullen, Wollsortiment DE bit E (38-40 Mikron). Buten groff Böverhaar, binnen witt, fien Ünnerhaar

Gefahr

De Moorsnuck höört to dat Huusveeh, wat up de Rode List steiht vun de Sellschup to'n Bewohren vun Huusveehrassen, de oolt un in Gefahr sünd. Dor is dat in Kategorie III inschreven. Meist weer de Moorsnuck ganz verswunnen, man nu gifft dat al wedder bi 5.000 Stück.