Mudderkrüüz

Dat Mudderkrüüz oder ok Ehrenkrüüz vun de düütsche Mudder is an'n 16. Dezember 1938 up Befehl vun Adolf Hitler to'n eersten Mol upleggt wurrn. De Vörlage hett Franz Berberich tekent. De Anfangswöör vun Hitler sien Befehl weern: „As en sichtboor Teken vun dat Düütsche Volk sien Dank an kinnerrieke Mudders legg ik dat Ehrenkrüüz vun de Düütsche Mudder up“. To'n eersten Mol utgeven warrt dat an'n 21. Mai 1939. Dat is dormols in dat Düütsche Riek de Mudderdag.

Wo dat Krüüz for goot ween scholl

De Regeerung vun dat Düütsche Riek harr dat dor up afsehn, dat Krüüz as en Utteknung för Verdeenste vun düütsche Mudders um dat Düütsche Volk up to leggen. Kortweg scholl dat dor um gahn, de Mudders ut to teknen, de veele Kinner kregen harrn. Just na de dormolige Ideologie vun den Natschonalsozialismus scholl en Mudderkrüüz bloß an Mudders gahn, wenn

• de Öllern vun de Kinner „vun düütschen Bloot“ un „arvduchtig“ weern,
• de Mudder so en Utteknung ok verdeent harr („arvgesund“, „anstännig“ un „ohn sittlichen Fehler“),
• de Kinner levennig up'e Welt kamen weern

Wie dat Mudderkrüüz updeelt weer

Dat geev dormols dree Aarten vun dat Mudderkrüüz:

• den drüdden Rang (Bronze) geev dat, wenn de Mudder veer oder fiev Kinner harrt hett
• den tweeten Rang (Sülver) geev dat, wenn de Mudder sess oder seven Kinner harrt hett
• den eersten Rang (Gold) geev dat, wenn de Mudder acht oder mehr Kinner harrt hett

• 
  Verlehn-Büdel för den tweeten Rang
• 
  Mudderkrüüz, tweeten Rang, in Sülver
• 
  Dat Mudderkrüüz warrt verlehnt dör Parteimackers un den Bund Deutscher Mädel (BDM)
• 
  En Fro ut Berlin mit dat Gollen Mudderkrüüz