Mwanza

Dit Woort hett noch annere Bedüden: kiek dorför ünner Mwanza (Mehrdüdig Begreep).

Wapen/Flagg	Koort
Basisdaten
Mwanza, Ilemela (Distrikt), Nyamagana (Distrikt)
Inwahners:	706.453
Geograafsche Laag:	2° 31′ S, 32° 54′ O

Mwanza is en Stadt in Tansania mit 225.244 Inwahners in der eigentlichen Stadt und 436.811, wenn een de Kuntreien dor ümto mitreken deit. (Stand jümmers 1. Januar 2005). Dat is de Hööftstadt vun de Region Mwanza un liggt direkt an’n Viktoriasee. En Wohrteken vun de Stadt sünd de Bismarck-Felsen.

Mwanza vun’n Viktoriasee ut sehn

Geografie

Mwanza liggt an’t Över vun’n Viktoriasee op 1134 m över de See.

Klima[1]	Januar	Februar	März	April	Mai	Juni	Juli	August	September	Oktober	November	Dezember	Johr
Regen in mm	90	139	147	199	90	17	21	26	36	108	169	180	1.222
Ø Temperatur in °C	22,6	22,7	23,1	23,0	22,9	22,1	21,7	22,3	22,8	22,8	22,8	22,5	22,6

Koort vun Tansania mit Mwanza

Geschicht

De Stadt liggt ünnerhalv vun en lütt Barg, vun den ut John Hanning Speke 1858 as eersten Europäer den Viktoriasee to sehn kregen hett. De Behörden vun Düütsch-Oostafrika hebbt 1890 en Bezirksnevenstell an de Steed vun de hüdige Stadt inricht un ehr den Naam Muansa geven, wat wohrschienlich vun dat Woord Nyanza ut de Sukuma-Spraak kummt un See bedüden deit. Vun 1892 af an hebbt de Kolonialbehöörden denn anfungen de Stadt un den Haven ünnerhalv vun de Boma na Plaan op- un uttoboon. To de Johrhunnertwenn hett de Anbo vun Boomwull an’t Över vun’n See anfungen. In’n Eersten Weltkrieg is de Stadt 1916 vun de Briten innahmen worrn.

Nadem in de Johren 1920 Gold funnen worrn is un de Central Railway vun Tabora 1928 trech worrn is, is de Stadt temlich wussen. Nadem dat Gold toenn gahn is un dat Land in de Johren 1970 sozialistisch wesen is, is dat mit Mwanza un de Region an’n Viktoriasee aver wedder bargdal gahn. In’n Uganda-Tansania-Krieg 1978 hebbt ugandsche Flegers denn dat Stadtzentrum un den Haven bombardeert un veel vun de Stadt is tweigahn. Eerst as se in de Johren 1990 in de Naverregion bi Geita noch wedder Gold funnen hebbt, is dat för de Stadt wedder beter lopen. In’n Börgerkrieg in Ruanda un Burundi is de Flooghaven un de Infrastruktur vun Mwanza denn as Angelkrüüz vun de humanitäre Hülp bruukt worrn, wat de Stadt ok wedder to veel Opswung verhulpen hett.

Weertschop

So teihn Kilometer to’n Noordoosten liggt de Flooghaven Mwanza. De Bahnlien warrt vör allen för’n Göderverkehr bruukt, aver dat gifft ok Personenverkehr över Tabora na Dodoma. De Haven is de wichtigste an’n Viktoriasee. Dat gifft veel Fähren un Frachtverkehr binnen Tansania un na Uganda un Kenia. En Straat geiht na Shinyanga un Singida.

An Industrie gifft dat vör allen Fischeree, Slachtereen, Textilindustrie un Sepenproduktion. Mit de Fischeree op Nilboors sett sik ok de Dokumentarfilm Darwin’s Nightmare utenanner.

Sport

De Stadt is mit’n Footballvereen Toto African in de 1. Liga vun Tansania vertreden.

Partnerschoppen

1966 hett Mwanza en Partnerschop slaten to Würzborg. En twete Partnerschop gifft dat mit Tampere.

Kiek ook bi

• Städer in Tansania

Weblenken

Partnerstadt Würzburg über Mwanza