Nördernee

Nördernee (hoochdüütsch Norderney) is een vun de oostfreesch Inseln in de Noordwesten vun Düütschland.

Wapen/Flagg	Koort
Basisdaten
Landkreis Auerk
Flach:	26,31 km²
Inwahners:	5.990
Inwahnerdicht:	227,7 Inwahners pro km²
Postleettall:	26548
Vörwahl:	04932
Geograafsche Laag:	53° 42′ N, 7° 9′ O
Grenzen bi OSM:	2456879
Gemeenslötel:	03452020
Websteed:	https://www.stadt-norderney.de/
Koort

Oortsschild von Nördernee mit hoochdüütschen un plattdüütschen Naam

Mit en Rebeet vun 26,29 Quadratkilometern is Nördernee nah Borkum de tweetgröttst Eiland vun de Inselgrupp. Insgesamt 85 Prozent vun de Inselflach gehört to de Nationalpark Niedersächsisches Wattenmeer.

De Stadt Nördernee, en Eenheitsgemeende, umfaat de gesamte Insel. Se gehört nah de Gebietsreform to de Landkreis Auerk. Mit 5.981 Inwahner (Stand: 31.12.2016) hett se de meest Inwahner vun all oostfreesch Inseln. 1948 kreeg Nördernee dat Stadtrecht. Bekannt is de Lüchttoorn vun Nörderneei.

Weertschop un Infrastruktur

För de Weertschop is vör allen de Tourismus wichtig.

Verkehr

Anners as welk von de annern oostfreeschen Inseln is Nördernee nich autofree. En grote Rull speelt de Autoverkehr aver nich, denn dat gifft op de Insel blots een Oort.

De Autoverkehr mit’n fasten Wall löppt över de Autofähren von de Reederee Nörden-Frisia, de von’n Haven Nördernee bet Nörddiek knapp 50 Minuten bruukt.

Op’n Flegerplatz Nördernee köönt ok Flegers op de Insel lannen.

Oortsschiller

Nördernee höört to de Öörd mit tweesprakige Oortsschiller Plattdüütsch/Hoochdüütsch. De tweesprakigen Schiller sünd 2009 opstellt worrn. Dor stünn toeerst as plattdüütschen Naam Nörderneei op. Dat weer von wegen dat dat Binnenministerium verlangen dee, dat plattdüütsche Naams op Oortsschiller von dat Institut för nedderdüütsche Spraak oder de Oostfreesch Landschap för good befunnen warrn mööt. De Oostfreesch Landschap hett sik na ehre Rechtschrievregeln för Nörderneei utspraken. Dat fünnen de Lüüd op Nördernee aver nich good, denn de Naam is vörher al jümmer Nördernee schreven worrn. Dorüm is de Schrievwies 2012 von Nörderneei op Nördernee ännert worrn.