Nair Al Saif

Nair Al Saif (araabsch ‏نير السيف‎; Nair as-Saif „De Helle in’t Sweert“) is de Egennaam vun den Steern ι Orionis in’t Steernbild Orion. He steiht dor ’n beten wat süüdlich vun’n Orionnevel (M 42).

Nair Al Saif
Nair Al Saif (ι Ori) steiht ünner de Nevels in’t Sweert vun Orion
Positschoon un Beteken
Steernbild	Orion; Ori
Rektaszension	5h35m26,0s
Deklinatschoon	-5°54′36,0″
Annere Naams	Hatsya
Bayer-Beteken	ι
Flamsteed-Tall	44
Bright-Star-Kataloog	HR 1889
Henry-Draper-Kataloog	HD 37043
SAO-Kataloog	SAO 132323
Physikaalsch Parameter
Afstand	2.300^[1] Lj
schienbore Helligkeit	+2,77
Spektralklass	O9 III/B0.8 III/IV
Sünnerheiten	Veerfacksteern

Egenschoppen

De schienbore Helligkeit vun Nair Al Saif is 2,77^mag, de dormit de achthellste Steern vun dat Steernbild. Nair Al Saif is de ünnerste vun de dree Steerns, de de Formatschoon vun’t so nöömte „Sweert vun’n Orion“ billn doot. Sien Naam bedüüt op plattdüütsch so veel „De Helle in’t Sweert“, wat dorop henwiest, dat he de hellste vun de dree Sweert-Steerns is. Ut dat Vermeten vun de Parallax is en Afstand vun de Eer vun ruchweg 2.300 Lichtjohren afleidt worrn.^[1]

Nair Al Saif is en Veerfacksteernsystem, wobi de Hööftsteern en spektroskoopschen Dubbelsteern is mit en Ümlooptiet vun üm un bi 29 Daag. Dat System besteiht ut en blauen Rees mit den Spektraltyyp O9 III un en üm twee Gröttenklassen düsteren Steern vun’n Spektraltyyp B0.8 III/IV.^[2] Dat Tosamenstöten vun’n Steernwind vun dat Poor maakt System to en starken Röntgenborn. Intressant is, dat de beiden Steerns in dat System verschedene Öller hebbt: De düstere Steern is ruchweg dubbelt so oolt, as de helle. De grote Exzentrizität vun de Ümloopbahn is en wieteren Henwies, dat dat System dör en gegensieitig Infangen vun de beiden Steerns tostannen kamen is.

Blangen den Hööftsteern is al in en Feernrohr en wieteren Nevensteern in’n Afstand vun 11,3″ to sehn. Disse Steern hett en schienbore Helligkeit vun 6,9^mag un höört to de Spektralklass B7. In en grötter’t Teleskop is denn in en Afstand vun 50″ ok noch de veerte Steern vun dat System to sehn.

Borns

↑ ^a ^b van Leeuwen, F. (November 2007), Validation of the new Hipparcos reduction, in: Astronomy and Astrophysics, Bd. 474 (2), S. 653–664, doi:10.1051/0004-6361:20078357
↑ Bagnuolo et al. (June 2001), ι Orionis-Evidence for a Capture Origin Binary, in: The Astrophysical Journal, Bd. 554 (1), S. 362–367, doi:10.1086/321367

[leeuwen-1] van Leeuwen, F. (November 2007), Validation of the new Hipparcos reduction, in: Astronomy and Astrophysics, Bd. 474 (2), S. 653–664, doi:10.1051/0004-6361:20078357

[bagnuolo-2] Bagnuolo et al. (June 2001), ι Orionis-Evidence for a Capture Origin Binary, in: The Astrophysical Journal, Bd. 554 (1), S. 362–367, doi:10.1086/321367

[1]

[2]