Nikolaus-Kark (Wulsdörp)
De Nikolaus-Kark weer bet 2010 en röömsch-kathoolsche Kark in’n Bremerhobener Stadtdeel Wulsdörp (Lützowstraat 22, Eck Krummenacker) in dat Dekanat Bremerhoben von dat Bisdom Hilmssen. Ehren Naam hett se von’n Hilligen Nikolaus von Myra. De Kark hett toletzt to de Parrgemeen von de Hart-Jesu-Kark in Geestmünn tohöört.
De Kark is 1959 boot worrn. Dat weer de eerste Kark, de de Architekt Josef Filke (Bremerhoben) boot hett. Se is as Massivbo boot worrn mit en 40 Meter hogen Toorn, de free steiht. Dat 5×6 Meter grote Gips-Relief an de Achtersied von’n Altor („Christus stillt den Storm“) un dat Altorkrüüz sünd von’n Bremer Bildhauer Kurt Lettow. Dat Relief is nu bi dat Bremer Landsamt för Denkmaalpleeg inlagert.
De Kark is an’n 6. Dezember 1959 inwieht worrn un de Karkengemeen Wulsdörp is an’n 1. Januar 1963 inricht worrn. 1966 hett de Nikolaus-Kark de Johannes-de-Döper-Kark in Lox as Filialkark tokregen. 1981 is de Kark in Lox denn en egenstännig Karkengemeen worrn. An’n 16. September 1979 is ut de Karkengemeen en Parrie worrn. Un an’n 1. November 2006 is de Nikolaus-Kark Deel von de Parrgemeen von de Hart-Jesu-Kark in Geestmünn worrn.
An’n 27. Februar 2010 hett von Bischop Norbert Trelle de Kark profaneert un dat Gebüüd is in’n Juni 2010 afreten worrn. Se hebbt eerst versöökt, de Kark to verköpen un anners to bruken, aver hebbt nix funnen. Nu is in dat Parrhuus von de Kark, dat in de Naverschop von de fröhere Kark steiht, de Nikolaus-Kapell inricht. De Hart-Jesu-Kark in Geestmünn is so bi dree Kilometer weg.
Weblenken
ännern- Infos to de Nikolaus-Kapell Wulsdörp op de Websteed von de Hart-Jesu-Kark in Geestmünn (hoochdüütsch)
Koordinaten:53° 31′ N, 8° 36′ O