OHB Technology

De OHB Technology AG (Orbitale Hochtechnologie Bremen) is en Holding, de sik mit Ruum- un Luftfohrt befaten deit. Se sitt in Bremen un is an de Börse noteert. Geschäftstwiege sünd Telematik & Satellit, Ruumfohrt & Sekerheit, Lasten un Wetenschop, Internatschonale Ruumfohrt un Ruumtransport, dorto Aerospace Strukturen. För de enkelten Geschäftstwiege hett OHB en Reeg vun Dochterunnernehmen. . An meisten bekannt vun düsse is woll de „OHB-System“, de Satelliten un annere Saken för de Ruumfohrt herstellen deit.. OHB kann so bi den Bo vun Satelliten de ganze Keed anbeden, wo Geld mit verdeent warrt: De Satelliten weert in den Bedriev plaant, vöranbröcht, boot un unnerholen. Ok de Daten weert lever un verarbeit’. Up den Markt för Lüttsatelliten is dat Unnernehmen mit siene Dochterunnernehmen ganz vörnweg in Europa. Up düt Feld is dat Unnernehmen al sinds 1985 togange. Dormols hett dat noch „Otto Hydraulik Bremen GmbH“ heten.

OHB Huus 1

Wat dat Unnernehmen herstellen deit

Mit de gröttsten Saken, de bi OHB maakt weert, sünd de Kommuniukatschoonssatelliten-Plattform Small Geo un de eersten 14 Galileo-Satelliten. Annere Saken, wo de Bedriev sik mit befaat un wo he bi mitmaakt, sünd:

• BremSat
• ABRIXAS
• Bird-RUBIN
• Harmony (Node 2)
• Tranquility (Node 3)
• Spacelab
• Columbus (Ruumlabor)
• ATV
• European Physiology Modules

Telematik

In de Telematik befaat sik dat Unnernehmen mit dat weltwiet Datenmanagement, sunnerlich mit de Verkehrstelematik. Dor warrt dor besunners up keken, Flottenmanagementsysteme tostanne to kriegen, datt de Transportkeden för Spediteure, Transporteure, Verladeunnernehmen usw. beter lopen doot. Hier is de Twieg OHB Teledata mit befaat. He höllt Andeele vun Timtec Teldatrans, Hansestar, Telematic Solutions un megatel.

Ruumfohrt un Sekerheit

In den Geschäftstwieg Ruumfohrt un Sekerheit befaat sik dat Unnernehmen dor mit, Lüttsatelliten vöran to bringen un ok in de bemannte Ruumfohrt un bi de Technologien för Sekerheit un Upklärung wieter to kamen. In düsse Feller sünd de Twiege OHB-System un OHB Electro Optics togange. Se hoolt Andeele an MT Aerospace AG, COSMOS International, ELTA, EOS, STS un ATB.

Satellitendeenste

OHB bedrifft nich bloß Satelliten, man bringt de ehre Deenste in Europa ok up’n Markt. Dor maakt OHB bi de Sellschoppen mit, de dat Orbcomm-Satellitennett bedrievt.

Lasten un Wetenschop

OHB hett de Kayser-Threde GmbH dorto köfft un is so in düt Feld instegen.

Geschichte

1958 is de OHB Otto Hydraulik Bremen GmbH grünnt wurrn. 1981 hett Christa Fuchs de Otto Hydraulik Bremen (OHB) övernahmen. 1985 is Manfred Fuchs vun ERNO kamen un bi OHB instegen. Dorols güng dat los mit de Ruumfohrt- un Satellitentechnik. 1991 hett de Afkörten OHB en ne’en Sinn kregen un de Naam vun de Firma is umwannelt wurrn in „Orbital- un Hochtechnologie Bremen“-System. 1993 hett sik de OHB Teledata in Bremen grünnt un dorto noch de STS Systemtechnik GmbH in Swerin. 1992 weer al de OHB-Umwelt-Technologie GmbH grünnt wurrn (hüde Telemondo GmbH). 1995 hett dat Unnernehmen Andeele övernahmen vun de Carlo Gavazzi Space S.p.A., Mailand. 1998 is de ORBOCOMM Düütschland AG grünnt wurrn. In dat Johr 2000 hett dat wedder en ne’en Naam geven: „Orbitale Hochtechnologie Bremen System GmbH“. 2001 is de OHB Teledata in den Ne’en Markt an de Börse gahn. 2002 sünd OHB-System un OHB Teledata tohopenföögt wurrn to de „OHB Technology AG“. Dormols is ok de ORBCOMM Europe LLC upmaakt wurrn, de Timetec Telematik GmbH is övernahmen wurrn (hüdigendags Timtec Teldatrans GmbH) un 34 % vun de Elta S.A. in Toulouse sünd ok övernahmen wurrn.

2005 hett OHB de Dochter MAN Technology AG vun den MAN-Konzern köfft (hüdigendags MT Aerospace AG) un in dat Johr 2007 is de Firma Kayser-Threde dorto kamen. In’n März 2008 hett de OHB oder beter de ehre Dochter MT Aerospace vergeevs versöcht, de dree düütschen Airbus-Warke in Nordenham, Varel un Augsborg to övernehmen. Afsicht weer ween, en Luftfohrtunnernehmen up to boen, de later an de Börse gahn scholl. De Airbus-Warke schollen dor bi in en düütschen Tolever-Bedriev för de Luftfohrt inboot weern. So hett de OHB-Grupp vörharrt, de Tögel in’e Hand to hebben bi en Unnernehmen mit 6.700 beschäftigten un bi eene Milliarde Euro Umsatz. In’n Summer 2009 hett OHB Technology denn avers dat italieensche Ruumfohrtunnernehmen Carlo Gavazzi Space S.p.A. köfft. In’n Januar 2010 hett dat Unnernehmen en Updrag an Land trocken över den Bo vun 14 Satelliten för dat Galileo-System. De Weert vun den Updrag liggt bi 566 Millionen Euro. Dor hett OHB dat Unnernehmen EADS Astrium den Updrag afjaagt. De weern dor ok böös achterher ween.

Weblenken

• http://www.ohb-technology.de
• http://www.ohb-system.de