Telematik
Telematik (tohopenföögt ut Telekommunikatschoon un Informatik) is en Technologie, wo de beiden Technologie-Twiege Telekommunikatschoon un Informatik in tohopenarbeiden doot. Mit de Telematik weert also de Informatschonen vun tominnst twee Informatschoonssysteme tohopenknütt. En sunnerliche Datenverarbeitung un en System vun de Telekommunikatschoon hölpt dor to. Dat Woort „Telematik“ is vun Nora un Minc 1978 bi ehre Studie över de Infortmatschoonssellschop to’n eersten Mol bruukt wurrn.
To de Feller, de vun de Telematik beackert weert, höört Reknernetten, as dat Internet, Telefon- un Mobilfunknetten. Unner annern weert ok düsse Spezialfeller vun de Telematik unner’n Ploog nahmen:
- Verkehrstelematik
- Flottenmanagement
- Huus-Management (Facility Management)
- Feernwarken
- E-Commerce
- Gesundheitstelematik/Telemedizin (E-Health)
- Bildungstelematik (E-Learning)
- Sekerheitstelematik
Dor warrt bit up den hüdigen Dag um streden, of de Telematik en egen Fack is, oder of datt man bloß en Twieg vun de Informatik vörstellen deit.
1998 is de düütsche Telematiksellschop „TelematicsPro e. V.“ grünnt wurrn (Hüdigendags 125 Unnernehmen as Liddmaat). Se hett sik vörnahmen, de Telematik bekannt to maken un unner de Arms to griepen.
En Studiengang Telematik gifft dat sinds 1985 an de Technische Universität Graz in Öösterriek (an’n Anfang en 10-Semester-Diplomstudium, hüdigendags updeelt in 6 Semester Bachelor- un 4 Semester Masterstudium. To düt Studium höört Deele vun de Informatik un ok vun de Elektrotechnik. Dat eerste Instituut för Telematik in Düütschland is 1982 an de Fakultät för Informatik bi de Universität Karlsruhe grünnt wurrn. Vun 1999 af an gifft dat ok an de TFH Wildau bi Berlin en Bachelor- un Masterstuium Telematik as Modell-Studiengang. Vun 2001/2002 af an hett he as en konsekutiven Studiengang internatschonale Zertifikate kregen. An de Fackhoochschool Kärnten gifft dat en Bachelor- un masterstudium Telematik/Nettwarktechnik.