Oost-Freesland

Mit de Beteken Oost-Freesland sall en Unnerscheed to Oostfreesland klaar maakt worden.

Oostfreesland is de Kuntrei, de fröher to de Graafschupp Oostfreesland hört hett. Dat sünd vandag so de Landkreisen Auerk, Leer un Wittmund un de Stadt Emden. Man wenn de hele freesche Kuntrei in'd Noordwesten van Neddersassen meent is, denn word van Oost-Freesland proot. Daar hören denn ok de ollnborger Landkreis Freesland, de vörmaals preusske Stadt Willemshaven un off un to ok dat Saterland to. Dat gift ok Lü, de daar denn ok noch de ollen freeschen Kuntreien van Rüstringen un dat Land Wursten toreken.

De Begriep Oost-Freesland word vööl van de Touristikers bruukt, man ok för Inrichtens, waar klaar wesen sall, dat neet blot Oostfreesland meent is (to'n Bispööl de Berufsakademie Oost-Freesland in Leer). Ok Musikers off freesche Vereenen, de neet blot in Oostfreesland hör Wark doon, bruken immer mehr dat Woord Oost-Freesland.