Oscar Ayuso
Oscar Miguel Ayuso Jr. (* 22. Dezember 1957; † 25. Juli 2009 in Belize-Stadt) weer en Ünnernehmer, Diplomaat un Politiker (UDP) ut Belize.
Ayuso is 1957 as Söhn von Oscar Miguel Ayuso Sr. boren.[1]He harr dat Ünnernehmen von sien Vader övernahmen un weer Direkter von G. Ayuso and Sons Limited un dat Reisbüro G. Ayuso and Sons Travel Agency.[2]
Ayuso weer von Februar 1999 bet 2003 för de Oppositschoonspartei UDP Maat von’n Senaat von Belize. Von 1999 bet August 2005 weer he ok Viez-Parteibaas von de UDP.[2]
Bi de Parlamentswahl in Belize 2003 weer he Kannedaat för de UDP in’n Wahlkreis Karibische Küst. He hett 46,93 % von de Stimmen kregen un dormit gegen Jose Coye von de PUP verloren. Bi de UDP-Vörwahlen in’n Wahlkreis Karibische Küst (vör de Parlamentswahl 2008) hett he in’n August 2005 gegen Carlos Perdomo verloren. Een Dag later hett he sien Amt as Viez-Parteibaas dalleggt.
Tosätzlich harr Ayuso Ämter as Viez-Vörsitter von dat Social Security Board, Vörsitter von de Port Authority un Viez-Präsident von de Hannelskamer von Belize övernahmen.[2]
Ayuso weer siet 1998 Honorarkunsel för Sweden in Belize un von 2008 bet to sien Dood Baadschopper för Belize bi’n Vatikan.[2]
Ayuso is an’n 25. Juli 2009 in sien Huus in Belize-Stadt dör Suizid doodbleven.[2] Siene Truurfier ünner Leid von Bischop Dorick Wright weer an’n 29. Juli 2009 in de Divine Mercy Church.[2] He liggt begraven op’n Lord’s Ridge Cemetery.[2]
He weer verheiraadt mit Halima Ayuso.[2] De beiden harrn twee Kinner.[2]