Osmond Peter Martin

Osmond Peter Martin (* 4. Dezember 1930 in Stann Creek (Dangriga); † 16. Februar 2017 ok dor) weer en Geistlichen ut Belize un röömsch-kathoolschen Bischop von Belize-Stadt-Belmopan.

Leven

Martin dee ut en Garifuna-Familie stammen. He weer in Stann Creek op de Sacred Heart School un op dat von Jesuiten föhrte St. John’s College in Belize-Stadt. Von 1953 bet 1959 hett he in Shrewsbury (Missouri) Philosophie un Theologie an dat Cardinal Glennon College un an dat Kenrick Seminary (Promotschoon to’n Dr. theol.) studeert. An’n 3. April 1959 is he as Preester för dat Bisdom Belize wieht worrn. He weer Kaplaan in Corozal un denn Preester in San Ignacio un in Belize-Stadt.

Paapst Johannes Paul II. hett em an’n 8. Juni 1982 to’n Wiehbischop in Belize un Titulärbischop von Thucca in Mauretania maakt. De Bischop von Belize, Robert Louis Hodapp, hett em an’n 7. Oktober 1982 de Bischopswieh geven; Mitkunsekraters weren Gordon Anthony Pantin, Arzbischop von Port of Spain, un Samuel Emmanuel Carter, Arzbischop von Kingston in Jamaika.

An’n 11. November 1983 is Martin von Paapst Johannes Paul II. as Bischop von Belize un Nafolger von Robert Louis Hodapp beropen worrn. An’n 18. November 2006 hett Paapst Benedikt XVI. Martin sien Rüggtridd ut Öllersgrünn annahmen. Ne’en Bischop von Belize is Dorick McGowan Wright worrn.

Ehren

2007 hett he den natschonalen Verdeenstorden The Order of Belize kregen.

Weblenken

• Indrag to Osmond Peter Martin op catholic-hierarchy.org (engelsch)