Patrice de Coninck
Patrice Charles Ghislain de Coninck (* 19. November 1770 in Brügge; † 22. Mai 1827 ok dor) weer en süüdnedderlandschen Jurist un Politiker.
De Coninck is 1770 as Söhn von Marie-Amelie van Zuylen van Nyevelt (1748-1830) un Baudouin de Coninck († 1770) in Brügge boren. Sien Vader is noch vör siene Geboort doodbleven. De Moder hett denn Joseph de Colnet de Gloriette (1744-1818) freet. Patrice de Coninck sülvs hett 1797 Françoise-Augustine van Outryve (1777-1837) freet. De Vader von siene Fro, Jean-Jacques van Outryve de Merckem, harr wat gegen de Eh, von wegen, dat de Coninck nich veel Geld harr un sien Dochter dat eenzige Kind weer un allens arven schull. Mit siene Fro harr he een Kind, den Söhn Theodore (1807-1855).
De Coninck hett an de Universitäten Löwen un Köln Juristeree studeert un weer denn Avkaat in Brügge. He weer Liddmaat von’n Präfekturraad von dat Leiedepartement un is denn von 1802 bet 1805 Präfekt von dat Departement Ain worrn. 1805 is he as Präfekt in dat Departement Jemappes wesselt un dor bet 1810 bleven. Von’n 10. Mai 1810 bet 10. Januar 1811 weer he Präfekt von dat Departement von de Scheldemünnen un hett denn dat Amt as Präfekt von dat Departement von de Elvmünnen övernahmen. Dat is he bet 1814 bleven. Na dat Enn von dat Eerste Franzöösche Kaiserriek weer he von’n 22. April 1815 bet August 1815 Maat von de Grondwetscommissie von dat Vereenigte Königriek von de Nedderlannen.
Von 15. September 1815 bet 21. Februar 1817 weer he Guvernör von Oost-Flannern. An’n 21. Februar 1817 is he denn Binnenminister von de Nedderlannen worrn un dat bet 19. Juni 1825 bleven. An’n 23. Juni 1825 is he denn Butenminister worrn un harr dat Amt bet to’n 1. Dezember 1825. De Coninck is an’t Enn von dat Johr 1825 swoor krank worrn un denn na Brügge gahn. An’n 16. März 1826 hett he den Titel Staatsminister kregen.
1810 is de Coninck Baron d'Empire worrn. 1816 is he in’n Adel von dat Vereenigte Königriek von de Nedderlannen opnahmen worrn un harr den Titel von en Ridder.
Literatur
ännern- M. Siegenbeek: Levensbericht van P.C.G. baron de Coninck, in: Handelingen van de Maatschappij der Nederlandse Letterkunde, 1827
- A. van der Meersch: Le chevalier Patrice de Coninck, homme d'état, in: Biographie Nationale de Belgique, Tome IV, Brussel, 1873, col. 893-895
- Reina E. van Ditzhuyzen: Patrice Charles Ghislain ridder De Coninck 1770-1827. in: Onderwijs als opdracht. Leven en werk van de eerste vijftien ministers belast met het onderwijs in de periode 1798-1830, Den Haag, Staatsuitgeverij, 1977
- Patrice-Charles-Ghislain de Coninck-Outrive in: Hamburgische Biografie, Band VI, S. 60–61