Philibert Jacques Melotte

Philibert Jacques Melotte (* 29. Januar 1880; † 30. März 1961) weer en britisch Astronom, sien Öllern weern aber ut Belgien inwannert.

In dat Johr 1908 hett he en nee'en Maand vun de Planet Jupiter opdeckt, de hüdtodag ünner de Naam Pasiphae bekannt is. De Naam hett de Maand aber eerst 1975 kregen. To Melotte's Tieden heet de eenfach Jupitermaand VIII, wiels dat de achte Maand weer, de vun de Jupitermaanden opdeckt wurrn weer.

An 16. Januar 1909 hett he de Asteroid Melitta opdeckt. In 1915 hett he en Katalog rutbrocht vun 245 Apen Steernhoopen un Kugelsteernhoopen, de besünners völ groote un ok mit bloss Oog sichtbar Hoopen, so as de Hyaden, dat Hoor vun de Berenike un de αPersei-Grupp enthollen deiht.