Pinta

De Pinta weer een vun de dree Scheep op Christoph Kolumbus sien eerste Expeditschoon vun 1492 bet 1493, op de he en Weg na Indien övern Westen söch. Mit vun de Partie weren dat Flaggschipp Santa Maria un dat Schipp Niña. En Seeweg na Indien hett Kolumbus nich opdeckt, vun wegen dat de Kontinent Amerika in’e Mööt keem, den he dormit för Europa opdeckt harr (Nadem al annere för em dat harrn, wat aver keen so grote Utwarken harr).

De Pinta weer dat gauste vun de dree Scheep. Vun de Pinta ut hett de Expeditschoon an’n 12. Oktober 1492 dat eerste Maal Land sehn.

De Pinta weer en Karavell, harr dree Masten un kunn üm un bi 60 Tünnen dragen. De Läng warrt op üm un bi 21 Meters un de Breed op söven Meters taxeert. Se harr en Mannschop vun 26 Mann. Ehr Kaptein weer Martín Alonso Pinzón.