Santa Maria (Schipp)
De Santa Maria weer dat Flaggschipp op Christoph Kolumbus sien eerste Expeditschoon vun 1492 bet 1493, op de he en Weg na Indien övern Westen söch. Mit vun de Partie weren de düüdlich lütteren Scheep Niña un Pinta. En Seeweg na Indien hett Kolumbus nich opdeckt, vun wegen dat de Kontinent Amerika in’e Mööt keem un den he dormit för Europa opdeckt harr (Nadem al annere för em dat harrn, wat aver keen so grote Utwarken harr).
An’n Wiehnachtsdag 1492 is de Santa Maria op en Plaat vör dat hüdige Haiti oplopen un kunn nich mehr reddt warrn. Dat Holt hebbt de Seefohrers denn bruukt, mit La Navidad de eerste spaansche Siedlung op amerikaanschen Bodden to boen, in de Kolumbus 30 bet 35 vun siene Landslüüd trüchlaten hett.
De Bowies is nich so nau bekannt. To vermoden is, dat dat Schipp ene üm un bi 25 Meter lange un över acht Meter brede Karacke weer. Kolumbus schreev in siene Opteken, dat dat Schipp, ok wenn dat negen Knoten maken dei, temlich traach weer un för so’ne Expeditschoon egentlich nich good to bruken weer.
