Portal:Wikinews/De Sorben sünd bang üm ehr Tokumft

31. März 2008: De Sorben sünd bang üm ehr Tokumft. Dat hebbt se nu noch wedder apentlich to’n Utdruck bröcht. Se sünd bang, dat se nich fähig wesen schöölt, noch wieder to existeren, denn de Bundsrepubliek Düütschland deit jem nich noog ünnerstütten. De Sorben in de Bundslänner Brannenborg un Sassen, de sik in’n Vereen Domowina tohoopslaten hebbt, seggt, se kriegt nich noog Geld vun’n Staat. Se sünd so nich in de Laag jemehr kulturelle Institutionen oprecht to hollen.

In jemehr Geschicht vun 1400 Johr weren de Sorben lang Minnerheit mank de Düütschen. Se weren jümmer as ahnbedüden un kulturlos ankeken un rafsett. De düütsche Mehrheitskultur dee de sorbsche Minnerheitenkultur jümmer mehr optehren. Ok de Dagbo för Bruunköhlen hett sien Andeel daan un mehr as 100 Dörper in de Region för jümmer sluckt. Ofschoonst sik de Bundsrepublik middewiels to de Rechten vun de Minnerheiten bekannt hett un ok de europääschen Verdrääg för dat Schulen vun Minnerheiten ünnerschreven hett, deit de Bundsrepublik noch jümmer blot dat Nödigste un versöcht noch Geller to strieken. Dat duurhaftige Bewohren vun Spraak un Kultur is so aver nich mööglich. Dorvun hett de Vereen Domowina in Form vun en Memorandum en Helproop an de düütsche un internatschonale Apentlichkeit rutgeven, se schöölt sik bi de Bundsrepublik insetten, dat de Tokumft vun de sorbsche Kultur sekerstellt warrt.

Aver dat Problem bedrippt nich blot de Sorben. Düütschland hett to’n Bispeel in de Europääsche Charta vun de Regional- un Minnerheitenspraken de Spraken Neddersorbsch, Böversorbsch, Däänsch, Noordfreesch, Saterfreesch, Romanes un Plattdüütsch goodkennt. Utnahmen dat Däänsche, dat en Staat achter sik hett, de sik för de Belangen vun de Dänen in Düütschland insett, gifft dat nich een Spraak, för de de Tokumft duurhaftig sekert is. Bi all de annern Spraken kriggt de Bundsrepublik dat nich hen, wat to doon jem to bewohren. Wat se doot, lett sik ehrder ünner Sterbebegleitung faten as ünner Spraakpleeg.