Hemmoor Zement AG
De Hemmoor Zement AG weer en Ünnernehmen in Hemmoor, dat von 1862 bet 1983 Kried afboot hett un dor Zement ut brennt hett.
Dat Zementwark von de Hemmoor Zement AG is 1862 von Jürgen Hinrich Hagenah grünnt worrn. 1875 is en Peerbahn von dat Zementwark an’n hüdigen Kriedsee na’n lütten Haven Swartenhütten boot worrn, von den ut de Produkten mit Scheep wegbröcht worrn sünd. De Zement is mit Schuten un Lichters na Hamborg bröcht worrn un dor denn in’n Hannel kamen oder op gröttere Scheep ümlaadt worrn un in’n Export kamen. Op’n Weg trügg hebbt de Scheep Köhlen för dat Zementwark laadt.
In de Johren vör’n Tweten Weltkrieg harr dat Zementwark üm un bi 1000 Lüüd in Lohn.
An’n 9. August 1882 is de Portland Cementfabrik Hemmoor AG grünnt worrn.
De Hemmoor Zement AG is in de Johren 1960 von de Alsen'sche Portland-Cement-Fabriken KG övernamen worrn un hett denn von 1972 af an to de Alsen-Breitenburg GmbH tohöört.
1975 hebbt se twee Brennavens dichtmaakt un 130 Lüüd hebbt jemehr Arbeid verloren. 1976 hebbt se denn de nableven Brennavens ok dichtmaakt un noch wedder 100 Lüüd hebbt de Arbeid verloren. Dor sünd denn blots noch 70 Lüüd bi nableven, de de Mahlanlaag wiederbedreven hebbt. 1983 hett dat Ünnernehmen denn ganz dichtmaakt. Vondaag is de ole Kriedkuhl von dat Zementwark mit Water vulllopen un billt den Kriedsee. Dat Gelänn weer 95 Hektar groot. Dorvon billt nu 33 Hektar den Kriedsee.
De twee hogen Schosteens von dat Zementwark sünd afreten worrn, blots dat Huus von de Verwaltung is stahnbleven. Vondaag gifft dat bi’n Kriedsee dat Zementmuseum, dat Stücken ut de Geschicht von dat Zementwark wiest.
Literatur
ännern- Herbert Müller: Chronik Zement aus Hemmoor 1866-1983 - Gründung, Blütezeit, Niedergang. Sülvsverlag, Hemmoor 1992
|
De Artikel „Hemmoor Zement AG“ is een exklusiven Artikel up de Plattdüütsche Wikiepdia. In anner Spraakuutgaven is de nich to finnen. |