Pulvermöhlenbeek

Pulvermöhlenbeek
Laag	Neddersassen
Stroomsystem	Elv
Läng	7,4 km
Afströömrebeed	11,62 km²
Born	bi Eßel
Münn	bi Heesdörp in’n Oost-Swing-Kanaal
Waterkenntall	DE: 598522

De Pulvermöhlenbeek is en 7,4 Kilometer langen Beek, de in’n Oost-Swing-Kanaal münnt.

De Pulvermöhlenbeek hett sien Born in’t Moor bi Eßel un is dor ok mit’n Köhlhornsbeek verbunnen, de in de Swing münnt. De Pulvermöhlenbeek flütt na Süüdwesten. An dat linke Över doot Sprakel un Heesdörp liggen un op dat rechte de Horner Holt. Bi Heesdörp is de Pulvermöhlenbeek över den Fischgraven mit de Bever verbunnen, aver de egentliche Loop knickt na Noorden af un münnt in’n Noorden von Heesdörp in’n Oost-Swing-Kanaal. Bevör de Oost-Swing-Kanaal anleggt worrn is, hett dat Stück twüschen de hüdige Münn von’n Pulvermöhlenbeek un de Oost ok to’n Loop von’n Puvermöhlenbeek höört.

Dat Water in’n Oost-Swing-Kanaal flütt in de Oost un in de Elv un toletzt in de Noordsee.

De fröhere Bahnlien Bremervöör-Stood löppt en ganz Stück parallel to’n Beek.

Op halven Weg twüschen Heesdörp un hüdigen Oost-Swing-Kanaal is üm 1550 rüm von de Bremer Arzbischöp en Pulvermöhl boot worrn. De Möhl is 1570 in de Luft flagen, denn aver wedder opboot worrn. Üm 1800 rüm hebbt se de Möhl to en Koornmöhl ümboot, de denn noch bet 1906 lopen is. Dat Gebüüd is in de Tied twüschen 1939 un 1948 kumplett brockfällig worrn. Vondaag staht blots noch de Grundmüürn von de ole Möhl.