Río Agalteca (Río Aguán)
| Río Agalteca | ||
|---|---|---|
| Laag | Yoro, Honduras | |
| ||
| Stroomsystem | Río Aguán | |
| Läng | 31 km | |
| Born | in de Cordillera Nombre de Dios | |
| Koordinaten Born: | 15° 34′ N, 86° 43′ W | |
| Münn | bi Olanchito in’n Río Aguán | |
| Koordinaten Münn: | Koordinaten:15° 27′ N, 86° 34′ W15° 27′ N, 86° 34′ W | |
| linke Blangenströöm | Quebrada Grande, Quebrada de San Luis, Quebrada San José Arriba | |
| rechte Blangenströöm | Quebrada de Chachas, Quebrada Arriba, Quebrada del Ojuste, Quebrada Honda | |
De Río Agalteca is en üm un bi 31 Kilometer langen Stroom in dat Municipio Olanchito, Departamento Yoro, Honduras, de von links in’n Río Aguán münnt.
De Stroom hett sien Born in de Bargen von de Cordillera Nombre de Dios an de Grenz na dat Municipio La Ceiba (Departamento Atlántida). Dat liggt an de Waterscheed na’n Río Blanco. Von dor flütt de Stroom toeerst in en lichten Bagen na Noordoosten un dreiht op en Süüdoost-Kurs. Von rechts nimmt he de Quebrada de Chachas un de Quebrada Arriba op un bi dat Dörp Briones von links de Quebrada Grande. Hier dreiht de Río Agalteca op en Süüd-Kurs. Bi Las Flores münnt von rechts de Quebrada del Ojuste un en Stück later de Quebrada Honda. An’n Noordrand von Medina kummt de Stroom ut de Bargen rut un flütt in dat Daal von’n Río Aguán (Valle del Aguán). In Medina föhrt ok de Ruta Nacional 23 mit en Brügg över’n Río Agalteca. He dreiht op Süüdoost-Kurs, nimmt von links de Quebrada de San Luis un de Quebrada San José Arriba op un löppt an dat Dörp San José vörbi. Toletzt münnt de Stroom en Stück in’n Süden von Olanchito in’n Río Aguán. De Gebüüd von de Stadt kaamt hier direkt bet an dat Över ran.
De Oort Agalteca, na den de Stroom nöömt is, liggt en beten in’n Noorden von Olanchito.