Dit Woort hett noch annere Bedüden: kiek dorför ünner Rio Coco.

De Río Coco (fröher ok Río Segovia nöömt; engelsch Coco River) is en 750 Kilometer langen Stroom in de Länner Honduras un Nicaragua von Middelamerika, de in de Karibische See münnt.

Río Coco
Laag Honduras un Nicaragua
Stroomsystem Río Coco
Läng 750 km
Afströömrebeed 24.767 km²
Born flütt ut Río Coman un Río Tapacalí tohoop
Münn an Cabo Gracias a Dios in de Karibische See (op 0 m över de See)
linke Blangenströöm Río Yarí, Río Macuelizo, Río Dipilto, Río Mozonte, Río Quisuli, Río Achuapa, Río El Jícaro, Río Wiwilí, Río Poteca, Río Yamale
rechte Blangenströöm Río Inalí, Quebrada Aguas Calientes, Quebrada Grande de Cuje, Río Esteli, Río Yalí, Río Pantasma, Río Cuá, Río Wamblán, Río Ulwaskin, Río Parpar, Río Bocay, Río Lakus, Río Umbra, Río Sangsang, Río Waspuk
De Cañón de Somoto
De Münn (Cabo Gracias a Dios)

Verloop ännern

De Río Coco billt sik dicht bi de Grenz twüschen Honduras un Nicaragua in dat Departamento Madriz (Nicaragua) ut Río Coman un Río Tapacalí. De Río Coman hett sien Born in dat Municipio San Marcos de Colón in Honduras. Nadem de beiden Strööm tohoopflaten sünd, flütt de Río Coco dör’n Cañón de Somoto, en negen Kilometer lange Slucht. An’t Enn von de Slucht münnt von rechts de Río Inalí un de Quebrada Aguas Calientes in’n Río Coco.

De Verloop von’n Río Coco is toeerst na Noordoosten. He nimmt von links den Río Yarí op un flütt op dat Rebeed von dat Departoamento Nueva Segovia. Kort vör de Stadt Ocotal nimmt he von links den Río Macuelizo op. De Stroom flütt an’n Süüdrand von Ocotal langs, wo de NIC-15 mit en Brügg över em rövergeiht, un nimmt von links den Río Dipilto un den Río Mozonte op. Achter Ocotal nimmt he ok noch von links den Río Quisuli un den Río Achuapa op. Düsse Beken kaamt all von de Cordillera Dipilto Jalapa dal. Hier dreiht de Río Coco op en Süüdoost-Kurs. Von rechts nimmt he de Quebrada Grande de Cuje op un flütt an’n Oort Telpaneca vörbi. Hier geiht de Straat NIC-51 mit en Brügg över’n Stroom. Bi Los Ecuentros münnt von rechts de Río Esteli un denn dreiht de Río Coco in en langen Bagen wedder op en Noordoost-Kurs.

Bi düssen Bagen münnt von rechts ok de Río Yalí. An düsse Steed drippt de Stroom ok op de Grenz twüschen de Departamentos Madriz un Jinotega. De Stroom blifft nu bet an siene Münn Grenzstroom. Toeerst twüschen Madriz un Jinotega, denn twüschen Nueva Segovia un Jinotega un toletzt twüschen de Staten Honduras un Nicaragua.

Bi Panalí nimmt de Río Coco von links den Río El Jícaro op un later von rechts den Río Pantasma un den Río Cuá. An de Münn von’n Río Wiwilí (von links) liggt de Dubbelstadt Wiwilí (op dat linke Över Wiwilí de Nueva Segovia un op dat rechte Över Wiwilí de Jinotega). In Wiwilí de Nueva Segovia ennt de Straat NIC-51 un in Wiwilí de Jinotega de NIC-43. Dat gifft keen Brügg, aver de Mööglichkeit, över’n Río Coco rövertokamen.

Bi Wamblán münnt von links de Río Poteca un von rechts de Río Wamblán. De Münn von’n Río Poteca is ok de Steed, an de de Río Coco anfangt, de Staatsgrenz von Honduras un Nicaragua to billen. Dat Grenzrebeed is besiedelt, aver man dünn un dat gifft bet an de Münn kene grötteren Öörd mehr.

Von links münnt de Río Yamale un von rechts de Río Ulwaskin, de Río Parpar, de Río Bocay, de Río Lakus, de Río Umbra, de Río Sangsang un de Río Waspuk. Dorbi is de Río Lakus de Grenz twüschen dat Departamento Jinotega un de Autonome Region Karibikküst Noord.

Op de letzten 150 Kilometer mäandert de Stroom stark un billt en Reeg dode Arms. De gröttste Oort hier an’n Ünnerloop is Waspán.

Toletzt münnt de Stroom an de Miskitoküst in de Karibische See. Dor billt he mit de answemmten Sedimenten dat Cabo Gracias a Dios.

De Minschen an’n Stroom höört to en goden Deel to de Miskito, de den Stroom in de Miskito-Spraak Wanki nöömt.

Weblenken ännern

  Río Coco. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:15° 0′ N, 83° 8′ W