De Karibische See is en 2.754.000 km² grote Blangensee von’n Atlantik. Den Noord- un Oostrand billt de Bagen von de Westindies. Eilannen un See billt tohoop de Region von de Karibik. Dat Water is in’n Kaimangraven bet to 7680 m deep.

Koort von de Karibische See
Ansicht von de Karibische See ut Satellitendaten genereert
Küst vör dat Eiland Providencia, Kolumbien

Se billt tohoop mit’n Golf von Mexiko de Amerikaansche Middellandsche See. Geoloogsch liggt de See to’n gröttsten Deel op de Karibische Plaat, blots de Noordwesten liggt op de Noordamerikaansche Plaat.

Geografie ännern

De Süüd- un Westgrenz von de Karibische See is kloor dör’n fasten Wall defineert. Dat sünd de Küsten von Venezuela, Kolumbien, Panama, Costa Rica, Nicaragua, Honduras, Guatemala, Belize un Mexiko. De Noordoostspitz von de Halvinsel Yucatán in Mexiko billt denn den Punkt, an den de Karibische See an’n Golf von Mexiko grenzt. Von dor warrt en Lien dör de Yucatánstraat na de Süüdwestspitz von Kuba trocken. Kuba billt tohoop mit Hispaniola (dat Eiland, op dat Haiti un de Dominikaansche Republik liggen doot), Jamaika un Puerto Rico de Groten Antillen. In’n Süüdoosten sluut sik de Lüttjen Antillen an. De grote Bagen, de dör de Eilannen von Grote un Lüttje Antillen tagen warrt, defineert de Grenz von de Karibische See na’n Atlantik. De bütersten Eilannen un dormit dat Enn von de Karibische See in’n Oosten sünd Bermuda un Trinidad un Tobago.

De Eilannen sünd to’n groten Deel von vulkaansche Herkumst, blots en poor von de lüttjeren Eilannen sünd Resten von Krallenriffs.

To de groten Strööm, de in de Karibische See fleet, höört de Río Magdalena, de Río Atrato, de Río Chagres, de Río San Juan, de Río Coco, de Río Motagua un de Belize River.

Klima ännern

Dör de Laag in de Tropen is dat Water von de Karibische See jümmer twüschen so 20 un bet knapp över 30 °C warm. Dat bedüüdt, dat de Region to dat Rebeed höört, in dat sik Hurrikans billen köönt (dor mutt dat Water warmer as 26,5 °C för ween). De Länner an de Karibische See warrt jümmer wedder von swore Hurrikans drapen.

Op de annere Sied bedüüdt dat aver ok, dat de Küsten vele Touristen antreckt. Tosätzlich gifft dat mit dat Grote Maya-Riff un annere ok en Reeg Krallenriffs, de Snorkel-Touristen antreckt.

Weblenken ännern

  Karibische See. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:15° 0′ N, 76° 0′ W