Röömsch Recht

Röömsch Recht is toeerst mol de Naam vun dat Recht, so as dat in de Antike in de Stadt Rom un in dat Röömsche Riek gullen hett. De Borns vun dat antike röömsche Recht sünd in den Corpus Iuris Civilis tohopensammelt wurrn. In dat Middeloller sünd se, sunnerlich in Bologna, wedder funnen wurrn un sünd denn bit in dat 19. Johrhunnert in de meisten Staten in Europa ankeken wurrn as de Borns vun dat Recht, wo een sik an to holen hett. Vundeswegen kann ok dat Recht, dat in't Middeloller un in de fröhe Nutied in Europa gullen hett, röömsch Recht nömmt weern.

Wieldes de Römers allerhand Inventschonen, de dat in de Antike geev, man bloß afkeken harrn vun de olen Greken, hefft se dat röömsche Recht ganz alleen tostanne brocht, ohn greeksche Vorbiller. Man Begreepe un Argumentatschonen ut de greeksche Philosophie hefft dor denn doch en Rull bi speelt, as dat röömsche Recht tohopenstellt wurrn is. De Wetenschop vun dat röömsche Recht, warrt just so, as de röömsche Philologie Romanistik nömmt.