Röpke (Vörnaam)

Röpke (ok Röbke un Roepke) is een plattdüütschen Vörnaam för Jungs.

Herkamen

Röpke kümmt woll vun de olen Naams Rupert, Ruprecht un Robert vun her. De ole germaansche Naam is (H)Ruotbert. Dor steekt de beiden Wöör hruot un beraht in. Hruot heet Pries oder Ehr un beraht heet glinsterig oder beröhmt. De Naam bedutt denn sowat as „Beröhmt un to priesen“ oder ok „De glinstert vunwegen sien Ehr“.

De plattdüütsche Naam

As dat bi de Plattdüütschen begäng weer, is vun de Naams eerst mal een korte Form vun maakt wurrn. Dat weer denn Robbe, Robbie oder ok Rubbe. As dor een Smusenaam för lüttje Gören vun maakt weern scholl, keem dor dat Anbacksel (Suffix) to'n lüttjer maken(Diminutiv) -ke achteran. Denn heet de Naam Robbeke oder ok Rubbeke. Dor is denn Röpke oder ok Röpcke vun wurrn. Dat heet so veel, as : Lütt Robert.

Plattdüütsche Tonaams

Vun düsse Vörnaam is denn ok de plattdüütsche Tonaam Röpke (ok Röpcke un Roepke) vun wurrn. De bedutt denn so wat, as : „Ut Röpke sien Familie“ oder ok „Vun Röpke sienen Hoff“. Düsse Tonaam is in Bremen un de Dörper dor umto ganz begäng.

Fundöörd

De plattdüütsche Vörnaam Röpke etc. finnt sik toeerst:

• 1701 in Schönemoor (Röbke)

Kiek ok nah bi

• List vun plattdüütsche Vörnaams.

Weblenken

• Wofaken un woneem de Vörnaam in Düütschland vörkummt: Röpke, Röbke